Վարոսյան. Բադասյանի հայտարարությունը չի կարող որակվել ՀՀ քրեական օրենսգրքի 301-րդ հոդվածով

Իրավունք 11:06 30/01/2021 Հայաստան

Վարոսյան. Բադասյանի հայտարարությունը չի կարող որակվել ՀՀ քրեական օրենսգրքի 301-րդ հոդվածով

Փաստաբան Երվանդ Վարոսյանը, անդրադառնալով Վահան Բադասյանի կալանավորմանը, գրում է.

«Եթե անգամ Վահան Բադասյանը ուղիղ կոչ է արել ֆիզիկապես ոչնչացնել Նիկոլ Փաշինյանին, միևնույն է այդ հայտարարությունը չի կարող որակվել ՀՀ քրեական օրենսգրքի 301-րդ հոդվածով։

Նշված հոդվածը պատասխանատվություն է սահմանում իշխանությունը զավթելուն, տարածքային ամբողջականությունը խախտելուն կամ սահմանադրական կարգը բռնի տապալելուն ուղղված հրապարակային կոչերի համար։

Մինչդեռ Ն.Փաշինյանին ոչնչացնելու կոչը չի կարող ուղղված լինել ոչ իշխանությունը զավթելուն, ոչ պետության տարածքային ամբողջականությունը խախտելուն, ոչ էլ սահմանադրական կարգը բռնի տապալելուն։

Հայաստանի Հանրապետությունը պարլամենտական կառավարմամբ պետություն է։ Վարչապետի պաշտոնը զբաղեցնող անձի ոչնչացման դեպքում, Կառավարության կառուցվածքի և գործունեության մասին ՀՀ օրենքի և ՀՀ վարչապետի 2018 թվականի ապրիլի 21-ի «Վարչապետի բացակայության և լիազորությունների կատարման անհնարինության դեպքերում վարչապետին փոխարինելու կարգը սահմանելու մասին» N 412-Լ որոշման ուժով կարող է հանգեցնել միայն նրան, որ ՀՀ վարչապետի լիազորությունները սկսի իրականացնել առաջին փոխվարչապետը։

Վահան Բադասյանին նման մեղադրանք առաջադրելով, նախաքննական մարմինն ու դատախազությունը, իսկ կալանավորումը որպես խափանման միջոց ընտրելու մասին որոշում կայացրած դատավոր Մանվել Շահվերդյանը փաստում են, որ իշխանությունը Հայաստանում փաստացի պատկանում է բացառապես Նիկոլ Փաշինյանին, փաստում են, որ թե Ազգային ժողովը, թե առաջին փոխվարչապետը պարզապես մեխի գլուխներ են, իսկ իշխանություն ու սահմանադրական կարգ եզրույթները նույնականացված են Ն. Փաշինյանի հետ»։

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: