Պատերազմի ընթացքում մեր ազգը կենտրոնացել էր «Բայրաքթարի» վրա.Անդրանիկ Քոչարյան

Քաղաքական 16:44 01/02/2021 Հայաստան

«Պատերազմի ընթացքում մեր ազգը կենտրոնացել էր «Բայրաքթարի» վրա, բոլորը խոսում էին օդի բաց լինելու մասին, ԱԺ պատգամավորներով առավոտից իրիկուն ֆեյսբուքից դուրս չէինք գալիս և նայում էինք՝ ինչ հնարավորություններ կան, ինչ կարելի է բերել, բայց դրա մասին պետք էր տարիներ շարունակ մտածել՝ հենց առաջնահերթ գիտությունը բերելով դեպի բանակ»,- «Գիտությունը` որպես անվտանգության և զարգացման հենարան» խորագրով խորհրդարանական լսումներին ասաց Պաշպանության և անվտանգության հարցրեի մշտական հանձնաժողովի նախագահ Անդրանիկ Քոչարյանը:

«Իմ քայլը» խմբակցության պատգամավորը հայտարարեց՝ այսօր էլ քրեական գործեր են հարուցվել այն մարդկանց նկատմամբ, որոնք իրենց անտարբերությամբ և կոռուպցիայի բարձր մակարդակի պատճառով մեր անվտանգության կարողությունները տկարացրել էին:

Նրա խոսքով,գիտությունը միշտ պետք է լինի բանակի, պետության անվտանգության համակարգի լոկոմոտիվը:

Հարց բարձրացնելով, թե խորհրդարանական լսումներից հետո պետությունն արդյո՞ք կունենա բանակի հետ աշխատելու ծրագիր՝ պատգամավորը հայտարարեց. «ՊՆ-ի համապատասխան ստորաբաժանումները պետք է առաջնահերթությունը դնեն ինտելեկտի՝ դեպի բանակ բերելու խնդրի լուծումների վրա: Կարծում եմ՝ այս հավաքի վերջում ինչ-որ հայտարարությամբ հանդես կգանք, որտեղ մեր ռազմաարդյունաբերական համակարգի ամբողջ կարողությունները պետք է վերանայենք, ոչ թե պետք է նայենք, որ ռադիոէլեկտրոնային պայքարի մեր տկար կարողություններով կարողացանք 2 «Բայրաքթար» իջեցնել»:

Քոչարյանի խոսքով՝ նոր հայկական ստեղծվող տեխնիկան պետք է մի քայլ առաջ լինի եղածներից:

«Վաղվա պատերազմը, որը պարտադրված կարող է լինել, լինելու է հեռահար կառավարվող պատերազմ, բայց հստակ ոգեղեն զինվորով, ոչ անտարբեր հրամկազմով և մեր առաջնահերթությունները պետք է հենված լինեն այդ կարողությունների միասնականության մեջ, գիտությունը դրա մեջ պետք է լինի առաջատար ուժը»-նկատեց «Իմ քայլը» խմբակցության պատգամավորը:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: