Ձեր վստահելի աղբյուրը

«Այս կնոջ վարքագիծը որևէ կերպ չեմ էլ ուզում մեկնաբանել, ինձ թվում է արդեն բոլորի համար պարզ է՝ սա ինչ է»,- ասուլիսում ասաց Երևանի ավագանու ԲՀԿ խմբակցության քարտուղար Հռիփսիմե Առաքելյանը՝ անդրադառնալով Նիկոլ Փաշինյանի կնոջ՝ Աննա Հակոբյանի ԱՄՆ այցին:

Նա նշեց, որ մոսկովյան վոյաժներից հետո Հայաստանում այցելել է երկու զոհված զինծառայողի ընտանիքներին, ֆոտոսեսիա արել ու հիմա էլ Լոս-Անջելես է մեկնել:

«Գիտեմ, որ շատերի հետ  են փորձել կապվել, նաև իմ ծանոթ ընկերների ընտանիքների հետ, որ Աննա Հակոբյանը ցանկություն է հայտնել այցելել նրանց տներ, ցավակցել, ասել էին՝  հանդիպումը պետք է արձանագրվի տեսանկարահանող սարքերով: Այդ մարդիկ ասել էին՝ որևէ կերպ չեն հանդուրժի, որ գաք ու մեր արյան վրա պիառվեք: Նրանք հրաժարվել են գնալ այդ մարդկանց տներ, այսինքն՝ եթե  պետք է չլուսանկարահանվեն, հետագայում պիառ անեն, այդ մարդկանց տուն չեն գնացել»,- ասաց Հ. Առաքելյանը: 

Ավագանու անդամի խոսքով, զգալիորեն քիչ է այն մարդկանց թիվը, ովրոնք թույլ են տալիս գալ ու  համաձայնվում են լուսանկարվել, մեծ դժվարությամբ են գտնում այդ ընտանիքներին:

Ռ. Առաքելյանի խոսքով, Աննայի պաշտոնը պետք է ուղղակի լիներ Նիկոլ Փաշինյանի կինը, բայց, ինչպես տեսնում են, շատ լուրջ դերակատարում ունի:

«Շարունավում է Աննայի արկածները Ամերիկայում, հայերը դավաճան պաստառներով դիմավորում են, գլխիկոր է դուրս գալիս օդանավակայանից:

Լավ, ի՞նչ են ուզում ապացուցել, որ իբր մենք նորմալ վիճակում ենք, ոչինչ տեղի չի ունեցե՞լ: Տեղի է ունեցել ողբերգություն, կորցրել ենք մեր տղաներին, անվտանգությունը, հայրենազրկվել ենք: Որքան ավելի շատ մնան իշխանության, այնքան մեր անվտանգությանը  խայտառակ ձևով սպառնում են»,- նշեց Ռ. Առաքելյանը:

Նա ասաց, որ հաղորդում է դիտել, որտեղ դատափետում են, արժեզրկում են հայոց բանակն ու ֆետիշացնում Փաշինյան-Հակոբյան զույգին. «Բանակից որևէ մեկը չի՞ ցանկանում խոսել: Պապանձնվել, նստել են: Խոսեք, տեսեք ձեզ ինչպես են վարկաբեկում, չե՞ք ուզում խոսել, պաշտպանվելու, ինքնապաշտպանական բնազդը չի գործո՞ւմ որևէ մեկի մոտ»: 

Ինչ վերաբերում է ընդդիմության քայլերին, նա նշեց, որ պահը առաջին մի քանի օրերին էին,  պահը կորցրեցին այդ փուլում փոփոխություններ անելու համար: Բայց, կարծում է, միանշանակ լինելու է այդ փոփոխությունը:

Խոսելով ՊՆ ներկայացուցիչ Արծրունի Հովհաննիսյանի այսօրվա հայտարարությունների մասին, մասնավորապես, որ ինքը պատերազմի օրերին ասել է՝ հաղթելու ենք, ոչ թե հաղթում ենք, Ռ.Առաքելյանն ասաց. «Հաղթելու ենք, Գյուռբագյոռ-2020 պրոպագանդա անող Հովհաննիսյան ասում է՝ երբևէ լսե՞լ եք, որ ասում եմ հաղթում ենք, ասել եմ՝ հաղթելու ենք»:

Անդրադառնալով Երևանի քաղաքապետ Հակ Մարությանի գործունեությանը, նշեց, որ տարբեր վարկանիշներով նա շատ ցածր ռեյտինգ ունի:

«Հաշի առնելով այդ հանգամանքը, տեսնելով, որ իր թիմն էլ  իրեն այլևս չի պահում, որոշել է դուրս ու ներս անել, ձնամաքրմամբ զբաղվել: Լավ եք անում, որ բահը վերցնում ու գնում եք  սառույցը կոտրելու: Բայց Մարության, մենք բահերով չպետք է դուրս գանք մայթերի սառույցները ջարդելու, հսկայական գումարներ ենք տվել դրա համար, ՀՈԱԿ ենք ստեղծել, որպեսզի կարողանանք մաքարման աշխատանքներ իրականացնենք Երևանում»,- ասաց Երևանի ավագանու անդամը:

Նա  կարծում է՝ երկիրն այս աղետալի վիճակից հնարավոր է դուրս բերել, պարզապես պետական մտածողությամբ գործիչներ են պետք:

«Երկրորդ նախագահի հարցազրույցը դրա վառ օրինակն էր, թե ինչպիսին պետք է լինի պետական գործիչը»,- ասաց Հ.Առաքելյանը: