Ռոբերտ Քոչարյանը հինգ օր կբացակայի հանրապետությունից
Երևանի ընդհանուր իրավասության դատարանի Շենգավիթ նստավայրում սահմանադրական կարգի ենթադրյալ տապալման գործով շարունակվող քննության ընթացքում, մինչ պաշտպանական կողմի միջնորդության քննարկմանն անցնելը, մեղադրող դատախազ Գևորգ Բաղդասարյանը խնդրեց դատարանին թույլ հայտարարություն անել։
Մեղադրող կողմը հիմնավորեց, քանի որ միջնորդության քննությունը երկար է տևելու, ավարտվելու է դատավորի խորհրդակցական սենյակ հեռանալով, իր հայտարարությունն ու դրանում նշված հանգամանքները կարող են աննպատակահարմար դառնալ։
Դատավորի հարցին ի պատասախան, դատախազը հայտնեց, հայտարարությունը վերաբերում է ՀՀ ոստիկանությունից ստացած իր տեղեկություններին։
Նա նշեց, որ Ոստիկանության, ԱԱԾ-ի տարբեր վարչություններից ստացած տեղեկությունների համաձայն, դատարանը թույլատրել է Ռոբերտ Քոչարյանին, որ 2021 թ. փետրվարի 3-8-ը ներառյալ ժամանակահատվածում մեկնել Հայաստանից, այդ պատճառով խնդրել են Ռոբերտ Քոչարյանի նկատմամբ սահմանափակումներն այդ ընթացքում վերացնել, այնուհետև կրկին կիրառել։
Դատախազն ասաց, նախորդ նիստերից մեկում այդ հարցը բարձրացրել են, սակայն պարզաբանում չեն ստացել, իրենց հայտնի չէ, թե ինչի՞ հիման վրա է Ռոբերտ Քոչարյանին թույլատրվում մեկնել ՀՀ-ից, ինչո՞վ է պայմանավորված։
«Մենք դրան պետք է տեղեկացված լինենք, քանի որ ամբաստանյալի՝ դատական նիստերին մասնակցությունը և դրա հետ կապված բոլոր ռիսկերը շոշափում են մեր մեր կողմից իրականացվող մեղադրանքի պաշտպանության սահմանդրական գործառույթը։ Հետևաբար մենք հավասարափես պետք է հնարավորություն ունենանք տեղեկացված լինելու այդօրինակ գրությունների պատճառների մասին, մասնակցելու դրանց քննարկմանը, հայտնելու դիրքորոշումներ, առարկելու կամ համաձայնելու»,-ասաց Գ. Բաղդասարյանը։
Ի պատասխան Աննա Դանիբեկյանը հայտարարեց, որ դատավարության յուրաքանչյուր մասնակից իրավունք ունի ծանոթանալ գործի նյութերին և ստանալ տարբեր տեղեկություններ։
«Այդ թվում, հարգելի մեղադրող, Ձեր կողմից բարձրացված հարցի վերաբերյալ։ Դուք հարցը բարձրացրել եք նախորդ նիստերից մեկում, սակայն չես դիմել դատարանին տեղեկություններ ստանալու և դրանց ծանոթանալու համար։ Այդ հնարավորությունից զրկված չես եղել։ Եթե գտնում եք, որ դատարանի որոշումը ենթակա է բողոքարկման վերաքննության կարգով, այդ հնարավորությունից նույնպես զրկված չեք»,-ասաց դատավորը։
Դատախազ Բաղդասարյանն իր հերթին բանավոր խնդրեց դատարանին տրամադրել այն փաստաթղթերը, որոնց հիման վրա կայացվել է նման որոշում։
«Կտրամադրվեն»,-պատասխանեց դատավորն ու հայտարարեց, որ անցնում են Արմեն Գևորգյանի պաշտպան Էրիկ Ալեքսանյանի միջնոդության քննությանը։
Դատական նիստին ուղիղ հեռարձակմամբ կարող եք հետևել Yerevan.Today-ի ուղիղ եթերում։
Հիշեցնենք, որ սահմանադրական կարգի ենթադրյալ տապալման գործով անցնում են ՀՀ երկրորդ նախագահ Ռոբերտ Քոչարյանը, պաշտպանության նախկին նախարար Սեյրան Օհանյանը, ՊՆ ԶՈՒ Գլխավոր շտաբի նախկին պետ Յուրի Խաչատուրովը և նախագահի աշխատակազմի նախկին ղեկավար Արմեն Գևորգյանը։
Հարակից հրապարակումներ`
Լրահոս
Տեսանյութեր
Հայաստանի ու հայ ժողովրդի շահերը պաշտպանող իշխանություն գոյություն չունի. Բագրատ Սրբազան
