Ձեր վստահելի աղբյուրը

«Այս իշխանություններն իրենց գործունեության ամբողջ ընթացքում զբաղվել են մի բանով՝ օրենք փոխելով։ Որ օրենքը խանգարել է նրանց՝ իրենց անօրինություններն իրականացնելիս, փոխել են»,- այսօր ԱԺ շենքի դիմաց Նիկոլ Փաշինյանի հրաժարականի պահանջով բողոքի ակցիայի ընթացքում ասաց  ՀՅԴ-ական գործիչ Գեղամ Մանուկյանը։

Նա հիշեցրեց, որ մեկ տարի առաջ այս օրերին իշխանությունները երկրի առաջ ծառացած լուրջ խնդիրները թողած՝ իրենց քիմքին հաճո ՍԴ էին ուզում ձևավորել։

«Դրա համար են մեր բողոքի գործողությունները։ Բացի այդ, ակցիային մասնակցող քաղաքացիները հասկանում են՝ այս շենքում հավաքված մարդկանց մի ճնշող մեծամասնություն ամեն օր խայտառակում է մեր ժողովրդին, մեր երկիրն ու հայության քաղաքական միտքը։ Օր չկա, որ «Իմ քայլի» որևէ պատգամավոր հիմարություն դուրս չտա, խայտառակ հայտարարություն չանի ու վտանգի տակ չդնի մեր անվտանգությունը։ Երեկ Անուշ Բեղլոյանի հարցն էր, գիշերը՝ մեկ ուրիշի հիմարությունը։ Ամեն օր սա տեղի է ունենում։ Եվ ցանկացած քաղաքացու արժեզրկում են նրանք»,- կարծիք հայտնեց ՀՅԴ-ական գործիչը։

Ըստ Գեղամ Մանուկյանի, արժանապատվություն ունեցող ամեն քաղաքացի պետք է իր բողոքն արտահայտի։

«Եվ բոլոր իմքայլականները պատասխանատու են։ Նրանք, ովքեր պատերի տակ, նեղ շրջանակներում ասում են՝ գիտեք, մենք էլ համաձայն չենք, բայց դե Նիկոլը, իշխանությունը..., այլևս այդ ժամանակը լրացել է, բոլորը հավասար պատասխանատու են»,- նշեց նա։

Անդրադառնալով իմքայլական Անուշ Բեղլոյանի հայտարարությանը, ըստ որի, պետք է նայել ապագային, այլ ոչ թե վերադառնալ այն անվերջանալի քննարկմանը, թե ով է առաջինը հարձակվել, ումն է այդ տարածքը, ում պատմական հողն է Արցախը՝ Գեղամ Մանուկյանն ասաց, որ երեկ պատահաբար է համացանցում հայտնվել այդ տեսանյութը, բայց որևէ մեկը չգիտի, թե նմանատիպ վիդեոկոնֆերանսներ քանի-քանի անգամ են եղել։

«Եթե այսօր բարձրաձայն ասում են դրա մասին, ուրեմն այս 2 տարիներին, չի բացառվում, որ բազմաթիվ նման հայտարարություններ արած լինեն։ Դա իրենց գաղափարախոսությունն է։ Հայ ժողովուրդը պետք է իմանա՝ 2018 թվականի դեկտեմբերին խորհրդարան է բերել 88 հոգանոց պատգամավորական խումբ, որը կարծում է՝ կարևոր չէ, թե Արցախն ում հողն է»,- նկատեց նա։

Միևնույն ժամանակ, Գեղամ Մանուկյանը նշեց, որ կասկածում է իմքայլականների մեղսունակության վրա։

Հարցին, թե հնարավո՞ր է փոխվի «ՀՓՇ»-ի վարչապետի թեկնածուն, ՀՅԴ-ական գործիչը պատասխանեց. «Եկեք «ՀՓՇ»-ի կազմակերպական, քաղաքական գործողությունների մասին հարցերը շարժման համակարգողին տվեք»։

Դիտարկմանը, որ մամուլը գրում է, թե «ՀՓՇ»-ն կազմալուծվում է, Գեղամ Մանուկյանը հարցով արձագանքեց։

«Լո՞ւրջ եք ասում։ Երեկ էլ ուրիշ բան էին գրում»,- եզրափակեց խոսքը նա։