Ձեր վստահելի աղբյուրը

«Մենք հաճախ գնում ենք հետևանքների հետևից, հետևանքները վերացնելու ճանապարհով, մինչդեռ կանխարգելիչ քայլեր կարող էինք անել, ինչը չենք արել, այդ կանխարգելումը կարող էր լինել դեռ 2018 թվականին»,- այսօր  Շիրակի մարզի մտավորականների հետ «Ձայն հայրենյաց» նախաձեռնության հանդիպման ժամանակ ասաց գրականագետ, հայ բանասեր Սերժ Սրապիոնյանը:

Նրա խոսքով, «Ձայն հայրենյացը» լավ օրից չէ, որ ստեղծվել է, «Ձայն հայրենյացը» բոլորի մեջ կա։

«Մենք զբաղվում էինք մեր ստեղծագործական աշխատանքով և դրանից հաճույք էինք ստանում, փակեցին մեր ստեղծագործական աշխատանքի հնարավորությունները, մեզ մեր ուսերին մեր հոգու մեջ բարդեցին տասնյակհազարավոր երիտասարդների խեղված ճակատագիրն ու սպանված կյանքը: Այսօր մենք մեր պապերի նման առնչվում ենք 15 թվականին՝ մորթած սերունդների դժվարին ճակատագրի հետ հաշտվելու ծանր ընթացքին»,- նշեց նա:

Ըստ գրականագետի, այս աղետի դեմ  հայ ժողովուրդն անզոր չէր, պետք է կանխեր այն, բայց չկարողացավ:

«Չկարողացանք, որովհետև հավատացինք ստին, կեղծ գաղափարաբանությանը, ճշմարտանման խաբեությանը և կուրորեն գնացինք այն ճանապարհով, որտեղ մեզ առաջնորդեցին անգաղափար այս մարդիկ, ավելին՝ գուցե թշնամական գաղափարներով տոգորված այս մարդիկ»,-կարծիք հայտնեց նա։

Սերժ Սրապիոնյանը նաև նշեց, որ չի ուզում հազարավոր փաստերից օրինակներ բերել, երբ ջահել 18-20 տարեկան տղաներին տանում էին, լցնում բաց դաշտերը և թշնամուն ուղղորդում էին այդ բաց դաշտերը ու առանց պաշտպանական միջոցների հայտնված, ընդամենը համազգեստով զինվոր այդ ջահել երեխեքի կոտորածն էին կազմակերպում։

Նա վստահեցրեց, որ այս ամենն ամենայն պատասխանատվությամբ է ասում, ամեն բառի տակ կստորգրի և թող իրեն տանեն պատասխանատվության, բայց ցավն իր հոգու ներսում է , իր անձնական ցավը, որը ցավն է բոլոր հայ ջահելների:

«Օրվա իշխանություններին չի հետարքրքում գերիների ճակատագիրը: Նրանց ոչ միայն չի հետաքրքրում գերիների, այլ առհասարակ հայության ճակատագիրը, որովհետև վերադարձողները նրանց համար գլխացավանք են, այս վերադարձողները ճշմարտություն են բերելու իրենց հետ և որպեսզի այդ ճշմարտությունը չհասնի թմրած զգայարաններով, հիպնոսի մեջ հայտնված մարդկանց, որից նրանք հնարավոր է արթնանան, դրա համար նրանք ամեն ինչ անում են, որ այդ գերիներին մենք չվերադարձնենք»,- ասաց Սերժ Սրապիոնյանը: