Ձեր վստահելի աղբյուրը

«Այս իշխանության համար կա շատ ավելի կարևոր օրակարգ՝ ինչպես ավելացնել կալանքի սանկցիա տվող դատավորների թիվը, որովհետև բազմաթիվ պարկեշտ դատավորներ հրաժարվում են Նիկոլ Փաշինյանի վնգստացող դատավորները լինել և տալ կալանքի այն սանկցիաները, որոնք ուզում է երկրի գլխավոր հիմնական ֆեյքը»,- ԱԺ արտահերթ նիստում հայտարարեց «Բարգավաճ Հայաստան» խմբակցության պատգամավոր Նաիրա Զոհրաբյանը:

Դիմելով հեռուստադիտողին՝ նա հայտարարեց, որ հասարակությունը երևի միամտորեն ակնկալում  էր, որ այսօր դավաճանական կապիտուլյացիայից հետո խորհրդարանը պետք է քննարկեր ռազմագերիների խնդիրը, կամ տեղահանված հայրենակիցների խնդիրը, որոնցից մեկին կալանավորման սանկցիա են տվել, մշտական բնակության վայր չունենալու հիմնավորմամբ:

«Բա հադրութցի Վահան Բադասյանը որտեղի՞ց պետք է ունենա մշտական բնակության վայր, որին դուք զրկել եք դրանից»,- հայտարարեց Զոհրաբյանը:

Պատգամավորը նկատեց, որ ԱԺ-ում պետք է քննարկվեր այն հարցերը, թե ինչպես հարբած ադրբեջանցիները Սյունիքի սահմանին երբ ուզում կրակում են, կամ հայկական մայրուղու կողքին բարձրացնում են ադրբեջաներենով գրված ցուցանակ այն մասին, որ երթևեկողները գտնվում են Ադրբեջանի տարածքում:

«Դուք կարծո՞ւմ էիք, թե այստեղ պետք է քննարկվեր հարցը, թե ինչպես օգնենք ռազմագերիներին, որոնց ծնողները նախօրեին հանդիպել են դեռևս վարչապետի աթոռը զբաղեցրած անձի հետ և հուսաբեկ կրկին դուրս են եկել, որովհետև որևէ հարցի պատասխան չէին ստացել»,- հանրությանը դիմեց պատգամավորը:

Նա հայտնեց՝ վատ է զգում, որ խորհրդարան են բերվում կեղծ օրակարգեր, ըստ որոնց՝ եթե իշխող կուակցությունը գնա, ապա պետականությունը կփլուզվի:

Պատգամավորը համոզմունք հայտնեց, որ ԱԺ նախագահը պետք է պատվիրակություն կազմեր և գնային «Զվարթնոց» օդանավակայան և տեսնեին, թե այնտեղ ինչ էր կատարվում փետրվարի 1-ին  և պարզեին, թե ինչո՞ւ միայն երեկ Երևան-Մոսկվա միակողմանի տոմսը որոշ ավիափոխադրողներ դարձրել են 1050 դոլար:

«Բա չե՞ք ուզում գալ, իմանալ, թե այդ մարդիկ ինչու են հիմա գնում, բա նրանք 2018 թվականին մեծ հույսով քվեարկում էին ձեր օգտին»,- հայտարարեց «Բարգավաճ Հայաստան» խմբակցության պատգամավոր, և նկատեց՝  ողբերգություն է, որ մարդիկ ամբողջ տնով-տեղով, գույքով լքում են հայրենիքը:

Նաիրա Զոհրաբյանը նաև հայտնեց, որ Գագիկ Ծառուկյանի և ավիափոխադրողների հանդիպման արդյունքում պայմանավորվածություններ են ձեռք բերելու, որ վերջիններս տոմսը վաճառելուց նաև քաղաքացիներին կսովորեցնեն, թե ինչպես հեռախոսներում ներբեռնեն թեստը: