Ձեր վստահելի աղբյուրը

«Ես ուզում եմ խոսել այն վախերի մասին, որոնց մասին հանրության մի ստվար զանգված պատկերացում չունի, որոնց հիմքում ատելությունն ու սուտն է»,- այսօր  Շիրակի մարզի մտավորականների հետ «Ձայն հայրենյաց» նախաձեռնության հանդիպման ժամանակ ասաց ռեժիսոր Ռուբեն Հովհաննիսյանը։

Նրա խոսքով, հենց այդ վախերն են 2018 թվականից սկսած պառակտում հայ ժողովրդին։

«Այդ չարությունն ու ատելությունը հիմք դրեց պատերազմին, և ցավոք մեր պարտությանն ու հետպատերազմյան ժամանակաշրջանի այն իրականությանը, որից իշխանությունները փորձում են մեզ շեղել։ Մեզ ուզում են շեղել մեր հիմնական խնդրից, այն է՝ հայոց բանակի վերականգնում, սահմանների ամրապնդում, ազգի անվտանգություն, Արցախ»,- նշեց ռեժիսորը։

Ըստ Ռուբեն Հովհաննիսյանի, հայն այն ազգն է, որ հազարավոր տարիներ ապրելով, ունենալով բազմաստվածություն, երբեք չի ունեցել չարի Աստված, ինչպես պարսիկներն ու հնդիկներն ունեին։

«Ես զարմանում եմ՝ որտեղից այդքան չարություն մեր մեջ, ոչ մի դավանանք, որ մենք ունեցել ենք, ոչ մի կրոն, որ պաշտել ենք, չի եղել դեպի չարը։ Որտեղի՞ց մեզ այսքան չարություն, ես անկեղծ չեմ կարողանում պատկերացնել։ Ես բոլոր գիտակ ընկերներիս հարցնում եմ՝ եղբայր, այս չարությունը որտեղի՞ց մտավ մեր մեջ։ Ասեմ. թուրքը երկար ժամանակ փորձում էր մեզ հաղթել, չստավեց, նա տարբեր լեզուներով էր փորձում հաղթել, բայց մենք այդ բոլոր լեզուներով խոսում էինք իր հետ ու հաղթում։ Եվ մեր հակառակորդը խոսեց մեզ հետ հայերեն, և հաղթեց՝ հենց հայերենով։ Թուրքը մեր դեմ կիրառեց ամենահզոր զենքը՝ մեր լեզուն, իսկ մենք հայերենով իրար անպատվում ենք»,- կարծիք հայտնեց նա։

Ռուբեն Հովհաննիսյանի խոսքով, մտավորականների խնդիրն անհավատներին հավատացնելն է, նրանց բացատրելն ու ներկայացնելը բոլոր վտանգներն ու վախերը, որ սպասվում են հային։

«Վաղվա օրը չգիտենք։ Սյունիքում, Կապանում մեր հայրենակիցնրն ամեն առավոտ արթնանում են թուրքի կրակի տակ, ամեն օր տեսնում են թուրքի դրոշը։ Հիմա Երևանն ամենասև ու մութ կետն է, քանի որ ամենաբացասական լիցքերը կենտրոնացած են այնտեղ...։ Երբ մենք սկսում էինք պառակտվել, ոչ ոք ոչինչ չարեց։ Հիմա ժամանակն է միասնության ու սիրո, համերաշխության կամուրջ դառնալու»,- ասաց նա։

Բացի այդ, նա նշեց, որ թշնամին զորավարժություններ է սկսել, իսկ Կառավարության անդամը հորդորում է՝ մի վախեցեք։

«Չէ, դու ինձ չես կարող ասել մի վախեցիր, քանի որ մի զորավարժություն արեցին Նախիջևանում ու կորցրինք Արցախը։ Ես ունեմ վախենալու տեղիք։ Մենք պետք է մտածենք՝ ինչ ենք թողնելու սերունդներին։ Մենք նախատում էինք մեր հայրենակիցներին, որ 1915-ին թույլ տվեցին՝ թուրքն իրենց կոտորի, ժողովուրդ, նույն բանը մենք ենք անում. թուրքը մեզ ծաղրում է, թուրքը մեզ պարտադրում է։ Թուրքի հետ բարեկամություն են քարոզում, պետք է ամեն ինչ անենք, որ բոլորը հասկանան, թուրք մեր դարավոր թշնամին է։ Ոչ մի առևտուր, ոչ մի բան, ոչ մի սահման, ոչ մի ճանապարհ չի կարող լինել նրա հետ։ Մենք չենք կարող թուրքի հետ ճանապարհ կիսել»,- շեշտեց Ռուբեն Հովհաննիսյանը։

Եվ վերջում նա հարց հնչեցրեց՝ ո՞ւր է հայոց բանակը, ինչո՞ւ չի գրվում, որ սահմանին կանգնած զինվորն ապահով է, որ բանակն ամուր է։

«Մոտենում է մայիսը՝ մեր հաղթանակների ամիսը։ Մենք հլը սերունդ պետք է կրթենք։ Ո՞նց ենք կրթելու, ի՞նչ ենք ասելու։ Բարդ է»,- եզրափակեց խոսքը նա։