Ձեր վստահելի աղբյուրը

«Որևէ բան չի փոխվել, «ՀՓՇ»-ն բավականին հաջող աշխատանքներ է տանում»,- այսօր լրագրողների հետ հանդիպմանն ասաց «Համերաշխություն» կուսակցության նախագահ Սարգիս Ավետիսյանը։

Նրա խոսքով, մամուլի հրապարակումները, թե ընդդիմությունը պառակտվել է, իրականությանը չեն համապատասխանում։

«Եթե մի տեղ հավաքվում են տարբեր քաղաքական կուսակցություններ, բնականաբար, նրանք նաև տեսնում են իրենց քաղաքական շահը, բայց  գերնպատակը, ինչի համար հավաքվել են այդ քաղաքական ուժերը, հայրենիքի փրկությունն ու օր առաջ այս իշխանություններից ազատումն է»,- նշեց նա։

Ըստ քաղաքական գործչի, Ռոբերտ Քոչարյանի հայտարարությունից հետո, որ ինքը պատրաստ է մասնակցել արտահերթ խորհրդարանական ընտրություններին, իշխանությունները չեն գնա այդ քայլին։

«Իրենք հասկանում են, որ իմաստ չունի մասնակցել ընտրությունների, որոնց արդյունքում իրենք կպարտվեն։ Ես համոզված եմ, որ բանը դրան չի հասնելու։ Նիկոլ Փաշինյանին հաշված օրեր են մնացել։ Այս կռիվը ոչ նրա կռիվն է, ոչ էլ այն քաղաքական ուժի, որը այժմ իշխանության գլխին է։ Սա Լևոն Տեր-Պետրոսյանի և Ռոբերտ Քոչարյանի տեսակետների միջև եղած կռիվ է։ Ինչ վերաբերում է նրան, որ ինքը՝ որպես Տեր-Պետրոսյանի հետևորդ, քայլ առ քայլ իրականացնում է այդ քաղաքականությունը»,- կարծիք հայտնեց նա։

Քաղաքական գործիչը նկատեց՝ Ռոբերտ Քոչարյանի իշխանության օրոք ՀՀ-ն սկսեց տարածաշրջանին թելադրել իր քաղաքական շահը, որի դեմ սկսեց պայքարել Թուրքիան։

«Նա ինչ էր անում, ամեն տարի 2.5 մլրդ դոլար էր ծախսում, որ հայոց ցեղասպանությունը չընդունվի։ Բայց հետո նա այդ գումարը ծախսեց ՀՀ-ի վրա, օգնեց Լևոն Տեր-Պետրոսյանին, հետո նա էլ բերեց Նիկոլին, Նիկոլն էլ սկսեց ծրագիրը կետ առ կետ իրականացնել։ Եվ պատահական չէ, որ «ՔՊ»-ի որոշ ներկայացուցիչներ սիրահարված են Թուրքիային։ Իսկ հիմա տեսեք. Նիկոլը ռուսներին պետք էր մինչև հունվարի 11-ը, ինչից հետո նրա օրերը հաշված են։ Հիմա նա գնում է հայ-ադրբեջանական և հայ-թուրքական հաշտեցման պայմանագրերին։ Արևմտյան ուժերն ուզում են Նիկոլին պահել, որ նա հայ-թուրքական հաշտեցման թուղթը ստորագրի։ Բայց ռուսական կողմն ամեն ինչ կանի, որ նա այդ թուղթը չստորագրի»,- նշեց նա։

Սարգիս Ավետիսյանը վստահություն հայտնեց՝ իշխող ուժը կողմ է, որ Հայոց ցեղասպանության հարցը փակվի։

«Եթե հայ պառլամենտականը կանգնում և ԱԺ-ում և ասում է Շուշա, կամ ՀՀ ղեկավարն ասում է, որ Շուշին հայկական չի, սրանք բոլորը տանում են դրան։ Գերիների հարցն էլ է սուտ։ Գերիներին պահում են, որ հայ-թուրքական հաշտեցման պայմանագիր կնքվի, նոր վերադարձնեն»,- մեկնաբանեց քաղաքական գործիչը։