Ձեր վստահելի աղբյուրը

«Իմ քայլը» խմբակցության մի քանի անդամի մշակած նախագիծը, որով նախատեսվում է փոփոխություններ կատարել «Զանգվածային լրատվության մասին» ՀՀ օրենքում, «Մեդիա պաշտպան» կազմակերպության ղեկավար Սերգեյ Չամանյանի գնահատմամբ հակասահմանադրական է, հակասում է մարդու իրավունքների հիմնարար օրենքներին, մարդու՝ տեղեկացված լինելու իրավունքին:

«Անձանց մի խմբակ, ովքեր 2018 թվականին եկել են իշխանության,  90 տոկոսը նախկին լրագրողներ են կամ ՀԿ սեկտորի նախկին ներկայացուցիչներ: Այսինքն այդ մարդիկ, որոնք տարիներ շարունակ պայքարում էին ինֆորմացիայի, ազատ խոսքի, ազատության, մարդու իրավունքների համար,  հենց հասան աթոռի, որոշեցին, որ կարող են այս կամ այն ձև սահմանափակել հայ քաղաքացու՝ ինֆորմացված լինելու իրավունքը»,- ասուլիսում ասաց Ս. Չամանյանը: 

Նա նշեց, որ այս փոփոխությունը խախտում է ոչ միայն լրագրողների, այլ նաև քաղաքացու իրավունքները:

«Քանի որ լրատվամիջոցը ստիպված կլինի ներկայացնել իր աղբյուրը, վտանգի տակ կդնի այդ աղբյուրը, որը կարող է այժմյան դավաճան ռեժիմի կողմից ռեպրեսիաների ենթարկվել: Այդ աղբյուրը, մեծ հավանականությամբ, այլևս չի տա այն ինֆորմացիան, որը կարող էր տալ՝ մնալով անանուն: Այսինքն, քաղաքացիները կզրկվեն այն ինֆորմացիայից, որն ինքը մինչ այդ ստանում էր:

Լրագրողները կտուժեն, քանի որ ինֆորմացիան կդառնա տխուր, նույնանման: Եթե բոլոր լրատվամիջոցները լինեն նույնանման, կշահեն այն լրատվամիջոցները, որոնք դաշտում ունեն գերիշխող դիրք: Փոքր ԶԼՄ-ները, որոնք ունենում էին աղբյուրներ պետական, ուժային մարմիններում ու չէին բացահայտում, ապրում էին էքսկլյուզիվ նյութեր ունենալու հաշվին, որոնք արտատպում էին մեծ ԶԼՄ-ներում, այժմ այդ հնարավորությունը կկորի, կկորի նաև այդ ԶԼՄ-ն»,- ասաց Մեդիա Պաշտպան» կազմակերպության ղեկավարը:

Նա շեշտեց՝ վատ օրենք է, որը սահմանափակում է ոչ միայն  քաղաքացիների՝  ինֆորմացված լինելու իրավունքը, լրագրողների՝ աշխատանք ունենալու իրավունքը, ԶԼՄ-ների իրավունքը՝ լինել մասնակից և չորրորդ իշխանություն, իհարկե, պետության շահերից դուրս է, քանի որ պետությունը գլորվում է  դեպի քաղաքական անդունդ, որը կոչվում է բռնապետություն:  Ս. Չամանյանն ասաց, որ նմանատիպ պրակտիկա օգտագործում են բռնապետությունները, այն երկրները, որտեղ ժողովրդավարության մասին չեն էլ մտածում, սակայն նման պետությունների ցանկը մեծ չէ:

Նրա կարծիքով,  նման օրենքի ընդունման պատճառն այն է, որ իշխանությունները վախենում են ճշմարտությունից, քանի որ ճշմարտությունը տասնամյակներ շարունակ չի եղել իրենց «ընկեր», աշխատել են սև PR-ի, ստի, կոմպրոմատային շուկայում. «Հիշենք, որ վարչապետի աթոռը զբաղեցրած անձը խմբագիր էր մի թերթի, որը գոյատևում էր միայն նրա հաշվին, որ զբաղված էր  սև PR-ով, ոչ ապացուցված մեղադրանքներ էր ներկայացնում  կամ գումար էր ստանում, որ չգրեր այս կամ այն քաղաքական գործչի, գործարար անձի վերաբերյալ, որ հանկարծ չսևացնի: Այդ անձնավորությունը, վերջին զարգացումներից ելնելով, հասկացավ, որ կորցնում է մենաշնորհը լինել այն միակը, ով կարող է սոցցանցում «լայվով» բոլորի վրա ոչ ապացուցված կեղտ թափել, խորտակել մարդանց բարի անունը, կյանքը:

Պատերազմի ավարտից հետո որոշ մարդկանց աչքեր բացվեց,  մարդիկ սկսեցին ինֆորմացիա տրամադրել բաց, լայն ինֆորմացիոն դաշտի ներկայացուցիչներին, ոչ միայն ԶԼՄ-ներին, նաև «Թելեգրամ» ալիքներին, սկսեցին հայտնվել տարբեր կոռուպցիոն սկանդալների տվյալներ, հետաքրքրի կադրեր, լուսանկարներ՝ առանց աղբյուրի:

Դա բերեց ոչ միայն վարչապետի աթոռը զբաղերած անձի իմիջի կտրուկ անկման, նաև իր գրպանի կուսակցության անդամների, որոնց դեմքը բացահայտվում է իրենց հարևանների, համագործակիցների կողմից: Այդ ամբողջը բերում է նրան, որ կորցնում են լեգիտիմությունը. եկել են պաշտոնի կոռուպցիայի, մարդու իրավունքների ոտնձգություների դեմ պայքարելու համար, բայց իրենք են կոռուպցիայի առաջին դրոշակակիրը, մարդու իրավունքների վնասողներից մեկը»:

Նա նշեց, որ իշխող ուժը կորցնում է իր դիրքերը սոցցանցերում, և, ըստ օդում կախված լուրերի, այդ օրենքով փորձում են հարվածել սոցցանցերին, որոնք չեն կարողանում կառավարել, օրինակ՝ «Թելեգրամ» ալիքները:

«Այդ օրենքը սխալ է ու չպետք է կիրառվի: Վստահ եմ, որ իրենք կընդունեն այդ օրենքը, քանի որ հրամանն իջեցվել է  վերևից»,- ընդգծեց Ս. Չամանյանը:

Այս ամենի հետևանքով, նրա խոսքով, անձնական, հեղինակային «Թելեգրամ» ալիքներն ուղղակի կդառնան անանուն, կշատանա սուտ ինֆորմացիան, որը կլինի ինչ որ քողարկված, հորինված անունի տակ:

«Այն ալիքները, որոնք ունենք հազարավոր ընթերցողներ, չեն թաքնվում անանուն լինելով, ստիպված կլինեն ուղղակի կորել դաշտից: Նույնն էլ ավանդական լրատվամիոցի մասին կարող եմ ասել»,- նշեց նա:

«Մեդիա պաշտպան» կազմակերպության ղեկավարը լրագրողական համայնքին համախմբման կոչ արեց, միասին դուրս գալ ու պայքարել, ընթերցողին ու ունկնդրին ցույց տալ՝ ինչն է ճիշտը, ոնց են իրեն խաբում, ոնց են իրենց ընտրած պատգամավորները մսխում գումարներն ու կրճատում իրենց ազատությունները: