Ձեր վստահելի աղբյուրը

«Ծրագրով սահմանվում են մինչև 2021 թվականի առաջին կիսամյակի ավարտը Կառավարության հակաճգնաժամային արձագանքման առաջնահերթությունները, նպատակները և գործողությունների շրջանակը»,- կառավարության նիստում ներկայացնելով «Տնտեսական արձագանքման ծրագիրը և գործողությունների նախնական պլանը հաստատելու մասին» որոշման նախագիծը՝ հայտարարեց  Տիգրան Ավինյանը:

Նրա խոսքով՝ 2020թ. ընթացքում կորոնավիրուսի համավարակը և Ադրբեջանի կողմից սանձազերծված պատերազմը, բացի հանրային առողջության և անվտանգության հետ կապված մարտահրավերներից, նաև տնտեսական շոկի աղբյուր է եղել:

«Ըստ վիճակագրական տվյալների՝ 2020-ի տնտեսական անկումը կազմում է 7-8%: Տնտեսական այլ հիմնական ցուցանիշներ նույնպես բացասական դինամիկա են գրանցել»,- հայտարարեց Տիգրան Ավինյանը և հավելեց, որ շոկը հաղթահարելու համար անհրաժեշտ է կարճ ժամանակում թիրախային միջոցառումների և գործիքների միջոցով ապահովել կենսունակ տնտեսական միջավայր և դրական սպասումներ առաջացնել:

Փոխվարչապետի խոսքով՝ ծրագիրը շեշտադրում է երեք հիմնական գերակայություն՝տնտեսական ակտիվության վերականգնման արագացում, վստահելի գործարար և սպառողական միջավայրի ապահովում և միջնաժամկետ տնտեսական քաղաքականության օրակարգի ձևավորում:

Հայտնելով, որ նախագծով նախատեսված է 14 աջակցության ծրագրեր գյուղատնտեսության ոլորտում բարձր ավելացված արժեք ստեղծող նոր մշակաբույսերի աճեցման և վերամշակման համար անհրաժեշտ նախապայմանների ապահովելու համար՝ Տիգրան Ավինյանը դրանցից առանձնացրեց արդյունաբերական կանեփի արտադրությունը:

Նիկոլ Փաշինյանը շտապեց հորդորել, որ այն չշփոթեն կանեփի մյուս նշանակության հետ, բայց չբացառելով ռիսկերը, հավաստիացրեց, որ դրանց կառավարման մեխանիզմներ կան:

Ավինյանը նշեց, որ աջակցության ծրագրերից մի քանիսը վերաբերում են կորոնավիրուսի տնտեսական հետևանքների հաղթահարմանը: Նա հավաստիացրեց, որ սուբսիդավորման նոր ծրագրով, նախատեսում է խրախուսել այն արտադրությունը, որը կապված է Թուրքիայից շատ ապրանքների ներմուծման արգելքի հետ: