Ձեր վստահելի աղբյուրը

«Իմ կարծիքով, ճիշտ կլիներ, որ լույս սփռվեր այն գործընթացներին, որոնց շուրջ խոսվում էր պատերազմի օրերին։ Մասնավորապես, պետք է խոսվեր ՊԲ նախկին հրամանատարի մահափորձի մասին»,- այսօր լրագրողների հետ հանդիպմանն ասաց ռազմա-քաղաքական գործիչ Գևորգ Գևորգյանը՝ անդրադառնալով Ջալալ Հարությունյանի՝ նոր պաշտոն ստանալուն։

Նրա խոսքով, արդեն ժամանակն է, որ գեներալները խոսեն, քանի որ պատերազմը միայն ռազմական գործողություն չէր, այնտեղ կար նաև  քաղաքական գործընթաց։

«Պատերազմը չկանգնեցնելու դրդապատճառը քաղաքական ուժերից է ուղղվում, և այսօր պետք է հասկանալ՝ ինչու մեր գեներալիտետը ոչինչ չի խոսում։ Մեր գեներալներն այսօր արդեն պարտավոր են խոսել, քանի որ այսօրվա ապազգային իշխանության  գործողությունները գնում են նրան, որ ամբողջությամբ կազմալուծեն բանակը, և հեղինակազրկեն մեր զինվորին։ Այդ քայլերին հակադարձել կարող է մեր գեներալիտետը՝ իր չոր դիրքորոշմամբ։ Միայն քաղաքական խոսքը բավական չէ»,- նկատեց նա։

Ըստ բանախոսի, բանակը եղել է, և պետք է լինի փակ կառույց։

«Ես դեմ եմ այն մոտեցումներին, թե բանակը պետք է լինի թափանցիկ։ Մեր թշնամիների համար են արվում այօրվա բարեփոխումները,  քանի որ մեր իշխանություններն այսօր ծառայում են թուրք-ադրբեջանական շահերին։ Մեկ անգամ չէ, որ ասել եմ։ Եվ իշխանությունների քայլերը միտված են շարունակաբար իրենց տերերին ծառայելուն։ Եվ հիմա գեներալիտետի խոսքը շատ կարևոր է։ Ես վստահ եմ, որ ՊՆ մեր գեներալներն ունեն արժանապատվություն, և պետք է նրանք հասկանան՝ այսօր խոսելու ժամանակն է»,- նկատեց նա։

Գևորգ Գևորգյանը նշեց, որ իր համար անհասկանալի է՝ ինչպես են գեներալները նոր պաշտոններ ընդունում մի իշխանությունից, որը չի ծառայում ՀՀ շահին։

«Դեռ 2.5 տարի առաջ թեզ կար, որ այս իշխանություններն անփորձ են, և դրա համար են սխալվում։ Բայց անփորձը ժողովուրդն էր, ում կարողացան խաբել ու ստով գալ՝ ոչնչացնելու ՀՀ-ն։ Մենք երեք տարի է՝ տեսնում ենք այդ ամենը։ Կրկնում եմ՝ անփորձը, պարզն ու միամիտը մեր ժողովուրդն էր։ Բայց, կարծում եմ, շուտով ժողովուրդն իր ձայնը կբարձրացնի։ Հայ ժողովուրդը չի կարող կանգնել ու նայել՝ ոնց է իր երկիրը քանդվում»,- նշեց նա։

Ըստ ռազմական-քաղաքական գործչի, քանի դեռ այս իշխանությունը կա, ոչ մի խնդիր ի շահ ՀՀ-ի, հայ ազգի ու զինվորի չի լուծվելու։

«Որպեսզի դու քո թշնամուն պարտադրես՝ վերադարձնել քո զինվորին, դու պետք է ուժ ունենաս։ Բայց դու չես կարող քեզ ծաղրողին պարտադրել, որ վերադարձնի քո զինվորին։ Ուժն է ծնում իրավունք։ Ի վերջո, այսօր այս ապազգայինների դավադիր հարվածների շնորհիվ թուրքը մտածում է՝ հաղթել է ինքը։ Իսկ հաղթողին չեն դատում։ Ծնողները պետք է հասկանան, որ իրենց զավակների վերադարձին  չեն կարող սպասել այս ապազգայինների օրոք»,- նկատեց Գևորգ Գևորգյանը։