Ձեր վստահելի աղբյուրը

«Հայաստանի իշխանության ներկայացուցիչները խաղաղասիրության մասին են խոսում, նաև անում են։ Մենք ամեն շաբաթ նորություն ենք ստանում, որ հերթական բնակավայրի մոտ մեր դիրքը զիջել են ադրբեջանիցներին»,- ասուլիսում ասաց «Ռազմինֆո» մասնագիտացված կայքի համակարգող, ռազմական փորձագետ Կարեն Վրթանեսյանը։

Նա նշեց, որ երեկ Ներքին Խնձորեսկ գյուղի մոտի հայկական դիրքերն են հետ քաշվել. «Իշխանությունն իրեն բնորոշ ոճով սկզբում այդ լուրն անվանեց լկտի սուտ, ապատեղեկատվություն, հետո կմկմալով հիշեցին GPS-ը, իսկ հիմա տեղեկատվություն է տարածվել, որ հայկական հենակետն այդտեղից հետ է քաշվել։

Ադրբեջանցիները եկել են, վերջնագիր են ներկայացրել մինչև այս ինչ ժամը նահանջել։ Զինվորականները գլխիկոր նահաջել են՝ կտրուկ վատթարացնելով այդ գյուղի պաշտպանական վիճակը»։

Ռազմական փորձագետի խոսքով, թշնամին ոչ միայն սպառնում է, նաև անում է։

«Թվում է՝ մի քանի քառակուսի մետր է, հեկտար է, բայց եթե վաղն իրավիճակը սրվի, նշանակում է՝  այդ բոլոր գյուղերը դատարակվելու են։

Հետագայում, եթե կարողանանք վերականգնել բանակը, իհարկե, ոչ այս իշխանություններով, հարյուրավոր կամ գուցե հազարավոր կյանքեր են պահանջվելու այդ անվտանգային համակարգը վերականգնելու համար։

Այսօր իշխանություններն իրենց աթոռները պահելու համար՝ գնում են այդպիսի զիջումների, ըստ էության, իրենք կարծես ապառիկով կյանքեր են նվիրում թշնամուն»,- ասաց Կարեն Վրթանեսյանը։

Ինչ վերաբերում է Կարսում ընթացող թուրք-ադրբեջանական համատեղ զորավարժություններին, նա նշեց, որ դրանք պլանային բնույթ են կրում, բայց չի նշանակում, որ չպետք է անհանգստանալ։  Վրթանեսյանի խոսքով, զորավարժությունների միջոցով թշնամին կատարելագործում է իր ուժերը, բացի այդ՝ դրանք ուղղված են Հայաստանի ու ՀՀ-ում ռուսական ռազմաբազայի դեմ։

Գերիների հարցը, ըստ փորձագետի, խաղաթուղթ է և Ալիևի, և Նիկոլ Փաշինյանի համար. «Ալիևը գերիների հարցով շանտաժ է անում Հայաստանին, առանձին նաև Փաշինյանին։ Երկրորդ՝ Փաշինյանն իր հերթին գերիներով շանտաժ է անում թե Հայաստանի բնակչությանը, թե հենց գերիների հարազատներին, նաև ընդդիմությանը։

Կարծես թե մենք էլ ենք գերի  փորձված, հին շանտաժիստ Ալիևի ձեռքում, և շանտաժիստ Փաշինյանի ձեռքում։

Ուղղակի Փաշինյանն ուժը չի պատում Ալիևի վրա, սեփական բնակչության վրա է պատում, իրենց է շանտաժ անում։

Մի լուրջ խնդիր եմ տեսնում, իհարկե, ասած միանշանակ չի ընդունվելու. եթե Ալիևը տեսնում է, որ գերիների հարցն այդպիսի հարմար լծակ է մեզ ճնշելու համար, անընդհատ փորձելու են նոր գերիներ վերցնել։ 62 գերի վերցվել է արդեն հրադադարի համաձայնությունից հետո»։

Նա նշեց, որ իշխանության՝ նույնիսկ տեղեկատվական պատերազմը սեփական ժողովրդի դեմ է։ Կ. Վրթանեսյանի խոսքով, սակայն տպավորությունն այնպիսին է, որ Փաշինյանը ցանկանում է, տենչում է ընդմիշտ մնալ իշխանության՝ իր, գուցե հետո կնոջ, երեխաների, թոռների համար։ Նրա գնահատմամբ, Փաշինյանի բոլոր գործողությունները  տիպիկ պոպուլիստ բռնապետի գործողություններ են, բավականին շատ զուգահեռներ կարելի է  անել Հիտլերի հետ՝  իշխանությունը զավթելու, պահելու մեխանիզմներում, նույնիսկ խաբելու, ատելություն քարոզելու, պառակտելու ձևերում։

Խոսելով ընդդիմության գործողությունների մասին, ըստ փորձագետի, փորձը ցույց տվեց, որ այդքան էլ արդյունավետ չեն, ներքին անհամաձայնություններ կան, որոնք, բնականաբար, ակտիվորեն հրահրվում են հենց իշխանությունների կողմից։

«Այո, եղել է կոռուպցիա, բազմաթիվ խնդիրներ, սակայն այն, ինչ արեց նոր իշխանությունը Հայաստանի պետականության հետ, աննկարագրելի է, լրիվ ավերվեց հայկական պետականությունը, այդ գործընթացը շարունավում է, իսկ այդ մարդիկ պնդաճակատորեն շարունակում են իրենց գործը։

Ցանկացած առաջնորդի, որում տեսնում են թեկուզ փոքր մրցակցային  վտանգ Փաշինյանին, միանգամից փորձում են ոչնչացել ոչ թե ֆիզիկապես, այլ բարոյապես, հեղինակազրկել։ Այսինքն, նույնը, ինչ անում էին թուրքերը Ցեղասապանության ժամանակ՝ վերացնելով հայ ժողովրդի առաջնորդներին, հեղինակավոր մարդկանց։ Նույն անում է Փաշինյանը քարոզչական գործիքներով, դրան գումարած անորոշությունը,  որից մարդիկ բարոյալքվում են, հուսահատվում, ինչի պատճառով էլ գնում են երկրից»,- ասաց Կարեն Վրթանեսյանը։