Ձեր վստահելի աղբյուրը

Փրկարար-որոնողական աշխատանքների արդյունքում, երեկ՝ փետրվարի 5-ին հայտնաբերվել է ևս մեկ զոհված զինծառայողի աճյուն՝ Հադրութի ուղղությունից:  Դատաբժշկական փորձաքննությունից հետո պարզ կլինի նրա ինքնությունը: Այս մասին տեղեկացնում է Արցախի արտակարգ իրավիճակների պետական ծառայությունը։ 

Որոնումներն այսօր շարունակվում են Հադրութի և Ջրականի (Ջեբրայիլ) ուղղություններում:

2020 թվականի նոյեմբերի 13-ից մինչև 2021 թվականի փետրվարի 5-ը հայտնաբերվել է ընդհանուր 1365 աճյուն:

Նշենք, որ նույն կառույցի երեկվա հաղորդագրության մեջ նշված էր. «2020 թվականի նոյեմբերի 13-ից մինչ այսօր որոնողական աշխատանքների ընթացքում  հայտնաբերվել է ընդհանուր 1355 աճյուն: Նախնական տվյալներով, դրանցից 15-ը՝ քաղաքացիական անձինք են»։ 

 Panorama.am-ը Արցախի արտակարգ իրավիճակների պետական ծառայության տեղեկատվության և հասարակայնության հետ կապերի բաժնի պետ Հունան Թադևոսյանից հետաքրքրվեց, թե ինչո՞ւ է մեկ օր տարբերությամբ հայտնաբերված աճյունների ընդհանուր թիվը 10-ով ավելացել, մինչդեռ մեկ օրում 1 աճյուն է հայտնաբերվել։ 

«Որոնողական աշխատանքների ընթացքում եղել են դեպքեր, երբ հայտնաբերված դիերի ինքնությունը պարզ է եղել կամ Սյունիքի մարզի հարակից տարածքում է հայտնաբերվել ու ավելի հեշտ է եղել տեղափոխել Գորիս, մեզ մոտ ընդհանուր թվում չի արձանագրվել։ 

Բայց ընդհանուր նոյեմբերի 13-ից որոնողական աշխատանքների արդյունքում հայտնաբերվել է 1365 աճյուն»,- ասաց Հ. Թադևսոյանը։