Ձեր վստահելի աղբյուրը

Սուրբ Աթոռում ՀՀ նախկին դեսպան Միքայել Մինասյանը «Տելեգրամ» ալիքում գրառում է արել՝ ի հավելումն երեկվա գրառմանը, որի համաձայն՝ միջազգային մեդիան Արցախ մտնելու համար պետք է ստանա ադրբեջանական հավատարմագիր։

Միքայել Մինասյանը գրել է.

«Ֆրանսիական պատվիրակության պատմությունից հետո, Արցախում ռուս խաղաղապահների հրամանատար, գեներալ-լեյտենանտ Ռուստամ Մուրադովը  Վաղարշակ Հարությունյանին նամակ է գրել, որում, մասնավորապես, ասել է, որ հնարավոր թյուրիմացություններից խուսափելու համար և մինչև նոր ցուցումներ ստանալը, խաղաղապահները Արցախի տարածք թույլ կտան այն երկրների քաղաքացիների մուտքը, որոնք ստորագրել են նոյեմբերի 10-ի եռակողմ հայտարարությունը։ Նամակում նշված է, որ նման մոտեցումն իրականացվում է Նիկոլի և Իլհամի հունվարի 11-ին ձեռք բերված բանավոր պայմանավորվածությունների հիման վրա։ Վաղարշակ Հարությունյանը, շառից-փորձանքից հեռո, այդ նամակը գաղտնի է պահել։

Այդ նամակի էությունն այն է, որ Հայաստայից Լաչինի միջանցքով Արցախ կարող են այցելել միայն Հայաստանի և Ռուսաստանի քաղաքացիները։ Մնացած բոլորը պետք է Արցախ այցելության թույլտվություն ստանան Ադրբեջանից։  Ինչևէ, ակնհայտ է, որ Հայաստանը վերահաստատել է ծեծվող տղայի կարգավիճակը և չի մտածում  դրանից դուրս գալու մասին։ Այս հարցով Հայաստանի ԱԳՆ լռությունը դրա ակնհայտ հաստատումն է։

Հ.Գ. Այն սփյուռքահայերին, որոնք իրենց բոլոր վերջույթներով աջակցում են Նիկոլին և ցանկանում են այցելել Արցախ, անկեղծորեն հաջողություն եմ մաղթում ադրբեջանական դեսպանատների անձնակազմերի հետ շփումներում»։