Ձեր վստահելի աղբյուրը

Ազգային-ժողովրդավարական բևեռի նախաձեռնող խումբը սկսել է հանուն Արցախի «Միացյալ Հայաստան» կուսակցության ղեկավար, ազատամարտիկ Վահան Բադասյանի ազատության բողոքի գործընթաց։ Այսօր նրանք Գլխավոր դատախազության շենքի մոտ են՝ պահանջելով ազատ արձակել Վահան Բադասյանին:

«Մեր ակցիան ոչ թե քաղաքական բնույթ է կրում, այլ մեր ազատամարտիկ ընկերոջը, հայ մարդու կյանքն ու առողջությունը փրկելու քայլ է»,- ասաց ակցիայի մասնակից Արթուր Գրիգորյանը:

Նա նշեց, որ Վահան Բադասյանն այսօր ազատազրկված է՝ հաշվի չառնելով, որ նա պատերազմի ժամանակ վնասվածք էր ստացել, վիրահատվել էր, ավելի քան վստահ են, որ այդ ծանր վնասվածքից հետո բանտային կյանքը հետվիրահատական վերականգնման ժամանակաշրջանի հետ ուղղակի անհամատեղելի է:

«Կալանավորվելու համար որպես «ծանրակշիռ» հիմք նշվել է Բադասյանի՝ մշտական բնակության վայր չունենալը: Նորից հաշվի չի առնվել, որ Բադասյանն իր մշտական բնակության վայրը, իր տունն ու տեղը կորցրել է այս պատերազմի հետևանքով:

Այս պահին տուն չունի, բնակության մշտական վայր չունի, քանի որ պատերազմի հետևանքով կորցրել է կամ ծախվել է այդ տունն ու հայրենիքը»,- ասաց Ա. Գրիգորյանը:

Նա նշեց, որ Բադասյանը փախչող տեսակ չէ, ու նրան լավ իմանալով՝ չպետք է կալանավորեին, այն էլ առողջական խնդիրներով:

«Առավել քան ակնհայտ է՝  նման ծանր վնասվածք ունեցող քաղաքացուն տանում ենք մահվան կամ առողջության կորստի»,- նշեց ակցիայի մասնակիցը:

Նրա խոսքով, պետք է իրավական գնահատական տրվի ու փորձեն հասկանալ՝ արդյոք Հադրութում տունը կորցրած հայ ազատամարտիկի նկատմամբ այդ քայլը քաղաքական ռեպրեսիա է, թե՞ ոչ:

«Նմանատիպ սպառնալիքներ հնչել են, բայց, չգիտես ինչու, պարոն Բադասյանն է ձերբակալվում: Հետևությունները թողնում եմ հասարակությանը, թե ուր ենք հասել ու ուր ենք գնում»,- նշեց Ա. Գրիգորյանը:

Ազատամարտիկ Պավլիկ Մանուկյանն ասաց, որ այսօր այստեղ են ու այսօր քաղաքակիրթ ձևով ասում են՝ բաց թողեք հերոսին. «Ոչ թե խնդրում ենք, այլ պահանջում՝ ազգի դավադիր պիղծ երևույթներ»:

«Հանցագործները կալանավորել են ազգի հերոսին ինչ է ասել է՝ Փաշինյանին պետք է շանսատակ անել: Ես եմ շանսատակ անելու: Իմ պես հազարները կան: Մեկ ա Նիկոլի վերջը շանսատակ լինելն է»,- նշեց Պ. Մանուկյանը:

Նրա խոսքով, զարմանալին այն է, որ մարդուն տնազուրկ են անում, հայրենիքը դավադրաբար վաճառում են, ազգը ցեղասպանության են ենթարկում, ցեղասպանությունը կանխողներին դատապարտում են կամ էլ կամայական վերաբերմունք ցուցաբերում:

«Ամենասարսափելին հայ ժողովրդի անտարբերությունն է: Այս ապիկար իշխանությունները վաղ թե ուշ հայտնվելու են աղբանոցում:

Վահանը դժվար օրերի միջով անցել է, բանտի պարիսպներն էլ մի օր քանդվելու են: Նրան կարող են կալանավորել, բայց չեն կարող դատապարտել, քանի որ դատապարտված են հենց իրենք:

Ազատություն իմ սիրելի մարտական ընկերոջը»,- դատախազության դիմաց ասաց Պ. Մանուկյանը:

Հիշեցնենք, որ ազատամարտիկ Վահան Բադասյանը կալանավորվել է հունվարի 30-ին: Նա մեղադրվում է Քրեական օրենսգրքի 301-րդ հոդվածով նախատեսված արարք կատարելու մեջ, այսինքն՝ իշխանությունը զավթելուն, տարածքային ամբողջականությունը խախտելուն կամ սահմանադրական կարգը բռնի տապալելուն ուղղված հրապարակային կոչերը։  Հունվարի 28-ին Եռաբլուրում զինվորական պանթեոնում լրագրողների հետ զրույցում Վահան Բադասյանն ասել էր, որ Նիկոլ Փաշինյանը  պետք է վերանա ու հեռանա. «Եթե չի հեռանում, ուրեմն կվերացնենք ֆիզիկապես, զենքով։ Ես սկսելու եմ կազմակերպել»: Հենց այս հայտարարությունից հետո նա բերման է ենթարկվել ԱԱԾ:

Վահան Բադասյանը չի ընդունում իրեն առաջադված մեղադրանքը: