Ձեր վստահելի աղբյուրը

Երևանի քաղաքապետարանի դիմաց ակցիա են անում մանկապարտեզի տարիք ունեցող երեխաների մայրերը: Նրանք բողոքում են մանկապարտեզներում ընդունելության ոչ պատշաճ կազմակերպման դեմ:

Ծնողներից Լուսինե Սարգսյանն ասաց, որ մի խումբ մայրիկներով այստեղ հավաքվել են, քանի որ մանկապարտեզներում ընդունելության հարցը դեռ կազմակերպված չէ ու հստակ ոչ մի բան ասված չէ, թե երբ է լինելու ընդունելություն:

«Մեկ տարի կարանտինում լինելով՝ ծնողները համբերել են, հիմա կարանտինն էլի երկարացվել է, մանկապարտեզների ընդունելության հարցով որևէ բան չի ասվել:

Իմ երեխային հարթագրվել եմ 2019 թվականի սեպտմբերից մսուր խումբ ունեցող մանկապարտեզում, սակայն համաճարակի պատճառով մեկ տարի է ընդունելություն չի եղել: Մեղմացվել են բոլոր կանոնները, դպրոցների համար նոր կանոններ են մտցվել նորմալ հաճախելիություն կազմակերպելու համար, բայց պետական մանկապարտեզների համար որևէ բան չեն ասում»,- նշեց Լ. Սարգսյանը:

Նրա խոսքով, 12 հազարից ավելի երեխա գրանցված է, սակայն դեռ օդի մեջ են, չեն հաճախում մանկապարտեզ:

Ծնողները դիմել են քաղաքապետարան, համայնքապետարան, մանկապարտեզների տնօրեններին, ու ամեն տեղից տարբեր պատասխաններ են ստանում՝ անհասկանալի ժամկետով հետաձգված է ընդունելությունը, կամ՝ սեպտեմբերից կլինի, մեկն ասում է՝ գարնանը, նույնիսկ ասել էին՝ փետրվարից 1-ից:

«Հուսահատ վիճակում ենք, որտեղ դիմել ենք, ստացել ենք տարբեր պատասխաններ: Մենք ուզում ենք աշխատանքի դուրս գալ, բացի այդ՝ երեխաներին շփում է պետք, զարգացումով չպետք է հետ ընկնեն իրենց հասակակիցներից»,- ասաց Լ. Սարգսյանը:

Ծնողներին լսեց Երևանի քաղաքապետարանի մամուլի խոսնակ Հակոբ Կարապետյանը: Նա ասաց, որ տեղյակ են խնդրին, քայլեր է նախաձեռնվում, ձեռնարկվում մանկապարտեզներում հավելյալ տեղեր, խմբեր ավելացնելու ուղղությամբ:

«Տեղյակ եք, թե որն է եղել պատճառը, որ անցած տարի ու մինչև օրս երեխաների ընդունելություն չի եղել: Տեղյակ եք, թե ինչի համար է մանկապարտեզներում հաճախելիության սահմանափակումներ եղել: Եղել է համավարակի պատճառով ու համավարակից բխող միջոցառումների արդյունքում: Երևանի քաղաքապետարանն այս առումով հետևում է բացառապես կառավարությունից եկող ցուցումներին»,- ասաց նա:

Հ.Կարապետյանի խոսքով, այդուհանդերձ, Երևանի քաղաքապետարանի համապատասխան ստորաբաժումները, համակարգող փոխքաղաքապետը նախաձեռնել են քննարկումներ համապատասխան գերատեսչությունների հետ այս հարցին լուծում տալու համար:

«Ակտիվ քննարկումներ են, լուծմանը մոտ ենք: Կարծում եմ՝ առաջիկա օրերին ինչ-որ լուծում կլինի, դրա մասին կհայտարարենք»,- ասաց քաղաքապետարանի մամուլի խոսնակը:

Ծնողները նշեցին, որ անվերջ քննարկումներ են, գոնե ժամկետ իմանան:

«Ինձ ընդհանրապես չգոհացրեց այդ պատասխանը: Նույն բանն են ասում, ինչ պաշտոնապես հնչում է: Հույս ունենք, գոնե գարնանից կսկսվի ընդունելությունը: Վարչապետն ասում է՝ շատ երեխաներ ունեցեք: Ստացվում է այնպես, որ տարեցտարի մանկապարտեզ չընդունված երեխաների թիվն ավելանում է: Ինչպե՞ս է այս հարցը լուծվելու: Շատ ծնողներ չունեն հնարավորություն իրենց երեխաներին տանել մասնավոր վճարովի մանկապարտեզներ»,- նշեց Լ.Սարգսյանը: 

Միաժամանակ նա ասաց, որ այս ընթացքում բազմաթիվ մասնավոր մանկապարետզներ են բացվել,  մասնավոր մանկապարտեզների «բիզնեսն ուղղակի ծաղկում է»:

«Թող գնան, ստուգեն, ո՞ր կանոններն են այնտեղ պահպանվում: Տարածքներով փոքր են, ընդունում էին այնքան, որքան կարողանում էին: Բայց քանի որ պահանջարկ կա, բոլորին ընդունում են: Այնտեղ  կորոնավիրուս չկա՞, չե՞ն վարակվելու, պետականներում կա՞»,- ասաց Լ.Սարգսյանը: