Ձեր վստահելի աղբյուրը

Microsoft-ի հիմնադիր, միլիարդատեր և բարերար Բիլ Գեյթսը YouTube-ի Veritasium հեռուստաալիքին տված հարցազրույցում ասել է, որ կորոնավիրուսի համաճարակից հետո մարդկությանը սպառնացող վտանգներն են կլիմայի փոփոխությունն ու բիոահաբեկչությունը: Այս մասին գրում է Ria-ն։

«Դրանցից մեկը կլիմայի փոփոխությունն է»,- ասել է Գեյթսը՝ պատասխանելով այն հարցին, թե ինչ վտանգների աշխարհը պատրաստ չէ:

Նրա կարծիքով, ամեն տարի այս գործոնի պատճառով մահացության մակարդակը «նույնիսկ ավելի բարձր» կլինի, քան ներկայիս համաճարակի ժամանակ:

Երկրորդ սպառնալիքը, ըստ Գեյթսի, բիոահաբեկչությունն է։

«Ինչ-որ մեկը, ով ցանկանում է վնաս պատճառել, կարող է ստեղծել վիրուս, ինչը նշանակում է, որ դրան բախվելու հավանականությունն ավելի բարձր է, համեմատած ներկայիս բնական  համաճարակի հետ», - ավելացրել է Գեյթսը:

Ավելի վաղ Microsoft-ի հիմնադիրը Süddeutsche Zeitung գերմանական թերթին տված հարցազրույցում ասել էր, որ աշխարհը պատրաստ չէ հաջորդ համաճարակին, որը կարող է տասն անգամ ավելի վատը լինել, քան COVID-19 համաճարակը:

«Հուսով եմ, որ երկու տարի անց իրավիճակն այլ տեսք կունենա: Պատվաստանյութեր, թեստեր, դեղամիջոցներ, համաճարակաբանություն, մոնիտորինգ. շատ բան կարելի է անել», - ասել էր նա:

Ըստ Գեյթսի, կորոնավիրուսը դարձել է առօրյա կյանքի մի մաս՝ նույն չափով, ինչ երկրաշարժերը, պտտահողմերը կամ կլիմայի փոփոխությունը, և նման սպառնալիքներին արձագանքը պետք է լինի գլոբալ: