«Հասկացանք՝ Ադրբեջանը պահանջներ է ներկայացնում, դուք էլ ձեր հստակ պահանջները ներկայացրեք»

Հասարակություն 17:31 08/02/2021 Հայաստան

Այսօր անհետ կորած զինծառայողների ծնողները կրկին պաշտպանության նախարարության դիմաց են: Նրանցից մի քանի հոգի հանդիպել են պաշտպանության նախարար Վաղարշակ Հարությունյանի հետ, թեև ցանկություն էին հայտնել, որ ներկա լիներ նաև ՀՀ ԶՈՒ գլխավոր շտաբի պետ Օնիկ Գասպարյանը:

Անհետ կորած զինծառայողի մորեղբայր Էմիլ Սարգսյանը լրագրողներին ասաց, որ գոհ չեն նախարարի հետ հանդիպումից, քանի որ իրենց բարձրացրած հարցերին հստակ պատասխաններ չեն ստացել: Հանդիպմանը զինծառայողների հարազատները բարձրացրել են գերիների վերադարձի, անհետ կորածների հետ կապված հարցեր:

«Գերիների վերադարձի հարցի հետ կապված նախարարն ասաց, որ հանդիպում է տարբեր պետությունների դեսպանների հետ: Անհետ կորածների հետ էլ կապված ասաց, որ ամեն կերպ գործողություններ են անում լուծումներ տալու համար:Մի հատ դրական, լուրջ, որ խնդիրը անհապաղ կլուծվի, պատասխան չստացանք:Անում ենք, անում ենք, անում ենք,… Ադրբեջանը չի տալիս, պահանջներ է ներկայացնում…Ժողովուրդ ջան, մենք էլ ենք ազգ, մենք էլ ունենք մեր հստակ խոսքը, կարող ենք մենք էլ մերն ասենք: Հասկացանք՝ պահանջներ են ներկայացնում, բայց չի կարելի այսքան ժողովրդի տանջել, դուք էլ ձեր հստակ պահանջները ներկայացրեք»,- ասաց հանդիպմանը ներկա Է. Սարգսյանը:

Նա նաև նշեց, որ իրենց մոտից Վաղարշակ Հարությունյանը հրաման տվեց ռազմական ոստիկանության պետին, որպեսզի շտապ հավաքեն սպաներին ու ով ինչ գիտի զինվորների վերաբերյալ, փոխանցեն, օգնեն ծնողներին:

Է. Սարգսյանն ասաց, որ մինչև ուրբաթ կրկին հանդիպում է լինելու, պահանջել են, որ անպայման ներկա լինի Օնիկ Գասպարյանը:

Էմիկ Սարգսյանը փնտրում է իր քրոջ որդուն: Վերջին անգամ նրա հետ խոսել է հոկտեմբերի 10-ին, Հադրութի դպրոցում են եղել: Դրանից հետո մինչ օրս որևէ տեղեկություն չունի:

«Աստված տա գտնեն ռազմագերիների մետ»,- ասաց անհետ կորած զինծառայողի մորեղբարը:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: