Ձեր վստահելի աղբյուրը

«Բարգավաճ Հայաստան» խմբակցության պատգամավոր Իվետա Տոնոյանը ԱԺ հայտարարությունների ժամին ունեցած ելույթում նշեց, որ երկու օր առաջ «Իմ քայլը» խմբակցությունը հայտարարություն տարածեց, թե խորհրդարանական ընդդիմության և հանրային սեկտորից եկած ազդակները վկայում են՝ երկրում խորհրդարանական արտահերթ ընտրությունների անհրաժեշտություն չի զգացվում:

«Սա ոչ ավելին է քան իշխանությունների հերթական մանիպուլյացիան և հանրությանը թյուրիմացության մեջ գցելու անհաջող փորձ»,- հայտարարեց պատգամավորը և իր պնդումը հիմնավորեց նրանով, որ չի կարծում, թե իշխանությունները մոռացել են մեկ ամիս առաջ արտահերթ խորհրդարանական ընտրությունների մասին իրենց հայտարարությունները:

Իսկ «Բարգավաճ Հայաստան»-ը, ըստ պատգամավորի, ասել էր, որ արտահերթ խորհրդարանական ընտրությունները հնարավոր է Նիկոլ Փաշինյանի հրաժարականի և նրա՝ ժամանակավոր պաշտոնակատար չլինելու պարագայում:

«Անկեղծ եղեք և պարզապես ասեք, որ Նիկոլ Փաշինյանն օրգանապես պատրաստ չէ հրաժեշտ տալու վարչապետի աթոռին»,- հայտարարեց Իվետա Տոնոյանը և նկատեց, որ ազնիվ կլիներ, եթե խոսեին իշխանությունների ձախողումների և իրենց պատասխանատվության մասին:

Պատգամավորի խոսքով, իշխանությունն ունի մեկ օրակարգ՝ սեփական վերարտադրության ապահովումը, որը դրսևորվում է տարբեր երկրներում դեսպաններ նշանակելով կամ նախարարական պորտֆելների պահպանությանն ուղղված քայլերով:

«Հազարավոր տղաներ զոհվեցին, տասնյակ հազարավորները վիրավորվեցին, իսկ իշխանությունները շարունակում են իրենց օրակարգը»,- հայտարարեց «Բարգավաճ Հայաստան» խմբակցության պատգամավորը և ողբերգության ամբողջ ծավալը հասկանալու համար իշխանության ներկայացուցիչներին խորհորդ տվեց առանց զրահաբաճկոնների, առանց թիկնապահների ընդամենը գնամ Եռաբլուր, ինչի համար, ըստ նրա, քաջություն է պետք:

Պատգամավորը հայտարարեց, որ իշխանությունները պետք է ընդունեն՝ սուտ էին հեղափոխական բոլոր, նաև՝ տնտեսական հեղափոխության մասին խոստումները , ինչպես նաև «Արցախը Հայաստան է» աղաղակումը:

Ըստ Իվետա Տոնոյանի՝ այդ ամենի համար մեղավոր էին իշխանությունները, բայց պատասխան տվեցին բոլորը: