Ձեր վստահելի աղբյուրը

««Հայրենիք» կուսակցությունն իր գործողությունները կառուցում է հանուն Հայաստանի, իր գործողությունները կառուցում է, որպեսզի այս դավաճանին հեռացնի իշխանությունից»,- ասուլիսում ասաց կուսակցության անդամ Բաբկեն Հարությունյանը:

Նա նշեց, թե կոնկրետ որ իրավիճակում ինչ գործողությունների կդիմի կուսակցությունը, կախված է տվյալ իրավիճակից:

Կուսակցության մամուլի քարտուղար Սոս Հակոբյանը շարունակեց, որ իրենք ստեղծել են կուսակցություն և հարցերի հանգուցալուծումը տեսնում են  քաղաքական ճանապարհով:

«Սահմանադրական ճանապարհները չեն սպառվել, մարդկանց որոշակի մասսայի գեներացման պարագայում հասնելու ենք իշխանության փոփոխության»,- ասաց Ս. Հակոբյանը:

Նա նշեց, որ «Իմ քայլը» նախապես հայտարարել էր արտահերթ ընտրությունների անցկացման հնարավորության մասին, սակայն, վստահ է,  ուսումնասիրություններ են կատարել ու հասկացել, որ  մեծամասնությունը պահելու շանսերը չնչին են:

«Իրականում իշխանությունն ինքն իրեն է սրանով դրել փակուղի: Այն հազարավոր մարդիկ, որոնք մտածում էին ընտրություններով հանսնեն փոփոխության, հիմա գիտեն, որ ճանապարհը փողոցում իրենց խոսքն ասելն է»,- ասաց «Հայրենիք» կուսակցության մամուլի քարտուղարը:

Բաբկեն Հարությունյանն ասաց, որ փետրվարի 20-ին ժամը 15:00-ին քաղաքացիները պետք է հավաքվեն Ազատության հրապարակում.

«Կամ նստում ենք տանն ու ամեն օր հայրենիք մի մասը  հանձնվում է թշնամուն, երկիրը հայտնվում է  սոցիալ-տնտեսական ավելի վատ վիճակում, կամ փետրվարի 20-ին դուրս ենք գալիս փողոց՝ դավաճան իշխանություններին հեռացնելու համար: Չպետք է հանձնվել, պետք է հետևողական ու համբերատար պայքարել: Հիշեք՝ հուսահատությունը բերելու է նրան, որ այս դավաճաններն ավելի ծանր պայմանների հասցնեն բոլորիս»: