Ձեր վստահելի աղբյուրը

ԱԺ հայտարարությունների ժամին «Բարգավաճ Հայաստան» խմբակցության պատգամավոր Վահե Էնֆիաջյանը հայտնեց, որ ըստ Վիճակագրական կոմիտեի հրապարակած ցուցանիշների, նախորդ տարի բոլոր ապրանքների գծով արձանագրվել է գնաճ:

Պատգամավորը հայտնեց, որ բուսական յուղը թանկացել է 44.3%-ով, շաքարավազը՝ 40.75%-ով, ձուն՝ 26.4, կաթնամթերքը՝ 7.7, միրգը՝ 12, բանջարեղենը՝ 9.9, հացը՝ 7.9, ալյուրը՝ 12.5, խմիչքը, ծխախոտը՝ 6.8, ոչ պարենային ապրանքները՝ 5.5 %-ով:

Ըստ պատգամավորի, միջմարզային մի շարք ուղղությունների տրանսպորտի սակագինը 15-40 %-ով բարձրացել է, իսկ ուղևորատոմսի գնի բարձրացմանը զուգահեռ որակի որևէ փոփոխություն չկա:

Նկատելով, որ գնաճի պարագայում որևիցե աշխատավարձ չի բարձրացվել և սոցիալական շոշափելի ծրագիր չի իրականացվել՝ Էնֆիաջյանը հայտնեց. «Որտե՞ղ են կառավարության պատկան մարմինների ներկայացուցիչները, որոնք պետք է պատասխան տան ստեղծված իրավիճակի համար։ Համատարած բացթողումների, ձախողումների հետևանքը՝ պաշտոնանկությունները, պետք է չուշանան»: