Ձեր վստահելի աղբյուրը

Երևանի ընդհանուր իրավասության դատարանում նախագահությամբ Աննա Դանիբեկյանի (Շենգավիթի նստավայր), շարունակվում է սահմանադրական կարգի ենթադրյալ տապալման գործով քննությունը։

Նիստի մեկնարկին դատավորը հայտարարեց, որ 2019 թվականի հոկտեմբերի 4-ին դատարան է ստացվել գործով վկա Բաբկեն Մկրտչյանի դիմումը՝ իրեն տուժող ճանաչելու վերաբերյալ։

«Հաշվի առնելով, որ այսօր Բաբկեն Մկրտչյանն ու նրա ներկայացուցիչ Զորայր Հարությունյանը ներկայացել են դատարան, դատարանն անցնում է  այդ միջնորդության քննարկմանը»,-ասաց Դանիբեկյանն ու խնդրեց դահլիճ հրավիրել նրանց։

Զ. Հարությունյանն ասաց, իր վստահորդ Բաբկեն Մկրտչյանը 2008-ի դեպքերից առավել շատ մարմնական վնասվածքներ ստացած ոստիկանության ծառայողներից մեկն է, խնդրում են գործով տուժողի կարգավիճակ տալ։

Դատարանը հայտարարեց՝ կես ժամ ժամանակ է տալիս դատավարության մասնակիցներին միջնորդության վերաբերյալ դիրքորոշում  ներկայացնելու համար։ Պաշտպանական կողմի ներկայացուցիչ Հայկ Ալումյանը դատարանից խնդրեց միջնորդության գրավոր տարբերակը, նաև տեղեկատվություն, թե ինչ վնասվածքներ է ստացել Բ. Մկրտչյանը, ինչո՞ւ մինչև հիմա տուժող չի ճանաչվել։

Մեղադրող կողմը նույնպես խնդրեց  գրավոր տրամադրել կամ դատարանի դահլիճում հրապարակել ներկայացված միջնորդությունը։ Զորայր Հարությունյանն ընթերցեց միջնորդությունը։ Նաև որպես փաստաբան տահոգություն հայտնեց, որ դատարանը դիմումը քննարկում է ոչ թե եռօրյա ժամկետում, այլ մեկ ու կես տարի անց։

Ի պատասխան փաստաբան Հայկ Ալումյանն առաջարկեց, որ դիրքորոշում ներկայացնի առաջինը մեղադրող կողմը։

Մեղադրող դատախազ Պետրոս Պետրոսյանն ասաց՝ առարկություն չունի։ Առարկություն չուներ նաև դատախազ Գևորգ Բաղդասարյանը։

Ալումյանն ասաց՝ ինքն էլ առարկություն չունի։ Արամ Օրբելյանը հստակեցրեց, հստակ դիրքորոշում ունեն՝ սույն գործով, սույն մեղադրանքով տուժող չի կարող լինել, ուղղակի այս պահին չեն առարկում, քանի որ կա դատարանի որոշում տուժողների վերաբերյալ, որը դեռ բողոքարկված չէ։

Յուրի Խաչատուրովի փաստաբան Միհրան Պողոսյանը հայտարարեց, որ այս գործով ընդհանրապես տուժողներ չեն կարող լինել, ինչի վերաբերյալ պաշտպանական կողմը միջնորդություն ներկայացրել էր։

«Մինչ օրս մեզ անհայտ է, թե քննիչը ցուցակ կազմելիս,  դատախազներն այն հաստատելիս  ինչ կանխավարկածով են առաջնորդվել, թե ում ընտրել որպես տուժող, ում՝ ոչ»,-ասաց Պողոսյանն ու ընդգծեց, ներկայացված միջնորդությունից չհասկացավ, թե Բ. Մկրտչյանը որտե՞ղ ու ի՞նչ հանգամանքներում է մարմնական  վնասվածքներ ստացել։

Սեյրան Օհանյանի փաստաբան Կարեն Մեժլումյանն ասաց՝ իր մոտ էլ է նման հարց ծագել, չկա կոնկրետացում, թե երբ, որտեղ, ինչ վնասվածքներ է ստացել Մկրտչյանը։

«Ինձ համար անհասկանալի է, թե այս գործով ամբաստանյալներին ո՞ր վայրի համար են որոշակի մեղադրանքներ վերագրում։ Կարևորում եմ, որ փաստական տվյալներ ներկայացվեն, որոից հետո ավելի ամբողջական դիրքորոշում կարող եմ հայտնել։ Իսկ ընդհանրապես, պնդում եմ, այս գործով տուժողներ չեն կարող լինել։ Այն մարդիկ, ովքեր եկել են դատարան, չեն կարող լինել տուժողներ»,-ասաց Մեժլումյանը։

Պաշտպան Վարդևանյանը նույնպես հարցեր ու մտահոգություններ հնչեցրեց։

Այս պահին էլ միջնորդության քննարկումը շարունակվում է։

Հիշեցնենք, որ սսահմանադրական կարգի ենթադրյալ տապալման  գործով անցնում են ՀՀ երկրորդ նախագահ Ռոբերտ Քոչարյանը, պաշտպանության նախկին նախարար Սեյրան Օհանյանը, ՊՆ ԶՈՒ Գլխավոր շտաբի նախկին պետ Յուրի Խաչատուրովը և նախագահի աշխատակազմի նախկին ղեկավար Արմեն Գևորգյանը։

Դատական նիստին ուղիղ հեռարձակմամբ կարող եք հետևել 5-րդ ալիքի եթերում։