Ձեր վստահելի աղբյուրը

ԱԺ հայտարարությունների ժամին «Լուսավոր Հայաստան» խմբակցության պատգամավոր Անի Սամսոնյանը հայտնեց, որ խաթարվել է Աբովյան քաղաքի Խաչատուր Աբովյանի անվան թիվ 1 դպրոցի դասապրոցեսը:

Նրա խոսքով՝ հունվարի 22-ին տեղի է ունեցել դպրոցի տնօրենի թափուր տեղի մրցույթ և երկու թեկնածուները ստացել են 4-ական հավասար ձայներ, իսկ նշանակման հարցի որոշումը մնացել է ԿԳՄՍ նախարարին:

Պատգամավորը տեղեկացրեց, որ թեկնածուներից մեկը գործող տնօրենն է, մյուսը՝ Աբովյանի 10-րդ դպրոցի հայոց  լեզվի ուսուցչուհին:

Հայոց  լեզվի ուսուցչուհին նոր տնօրեն նշանակվելուց հետո դպրոցի ուսուցչական անձնակազմին ասել է, որ կդիմի գործադուլի, իսկ աշակերտներն թլ հայտարարել են՝ դասադուլի:

Անի Սամսոնյանն ընդգծեց, որ դպրոցի ուսուցիչները և աշակերտները հայտնել են՝ 1 տարի առաջ կրթօջախի կառավարման խորհրդի կազմը փոխվել են,մարզպետարանի 3 և նախարարության 1 անդամներ են նշանակվել նախկինում Կոտայքի մարզպետ աշխատող Ռոմանոս Պետրոսյանի ընտանիքի անդամներն ու մտերիմները:

Նա ԿԳՄՍ նախարարությանը հորդորեց հանդիպել ուսուցիչների, աշակերտների հետ և բացատրեն տնօրենի ընտրության հիմքերը:

«Լուսավոր Հայաստան» խմբակցության պատգամավորը նկատեց, որ կառավարության հայտարարությունները բարեփոխումների մասին որևէ արդյունքի չեն բերել, ինչի արդյունքում  խորհուրդներ ու տնօրեն ընտրելիս շարունակում են տեսնել հովանավորչություն:

Ըստ պատգամավորի՝ հովանավորչությունը ևս կոռուպցիայի տարատեսակ է և պաշտոնյաները պետք է զերծ մնան դրանից:

Անի Սամսոնյանը գտնում է, որ պետք է պաշտպանվի երեխայի կրթություն ստանալու իրավունքը, այլ ոչ թե հովանավորչությամբ զբաղվեն, իսկ այդ հիմնարար իրավունքը չի պաշտպանվում, քանի որ խաթարվել է դասապրոցեսը: