Ձեր վստահելի աղբյուրը

Երևանի քաղաքապետի 2020 թվականի նոյեմբերի 18-ի արձանագրությամբ՝ դադարեցվել է «Իմ քայլը» կուսակցությունների դաշինքի Երևան քաղաքի ընտրական ցուցակով ընտրված Երևան քաղաքի ավագանու անդամ Արսեն Կարապետյանի ավագանու անդամի լիազորությունները:

Ա. Կարապետյանը Երևան քաղաքի ավագանու քաղաքաշինության և հողօգտագործման հարցերի մշտական հանձնաժողովի նախագահն էր:

Այսօր Երևանի ավագանու նիստի ժամանակ «Իմ քայլը» խմբակցության առաջարկությամբ Երևան քաղաքի ավագանու քաղաքաշինության և հողօգտագործման հարցերի մշտական հանձնաժողովի նախագահի պաշտոնում ընտրվեց «Իմ քայլը» խմբակցության անդամ Նուարդ Վարդանյանը:

Նուարդ Վարդանյանն ավարտել է Երևանի պետական բժշկական համալսարանը, նաև Հռոմում իտալերենի և իտալական մշակույթի «Լեոնարդո դա Վինչի» դպրոցը։ Նշենք, որ Արսեն Կարապետյանը ճարտարապետ է:

Այս հարցի քննարկման ժամանակ «Լույս» դաշինքից ավագանու անդամ Դավիթ Խաժակյանը դիմելով քաղաքապետ Հայկ Մարությանին՝ անդրադարձավ շինթույլտվությունների ուշացումներին:

«Հավանաբար տեղյակ եք, որ շինթույլտվությունների, ճարտարապետական վարչության լիազորություններում գտնվող համապատասխան թույլտվությունների մասով ուշացումները շատ-շատ են: Քաղաքացիները ստանում են ծանուցումներ, որ ձեր պատասխանը կլինի կոնկրետ ժամկետում, սակայն այդ ժամկետները չեն պահպանվում, մարդիկ նյարդայնանում են: Ուշացումները  դարձել են կառուցապողների թիվ մեկ դժգոհությունը: Ձեր ուշադրությունն եմ հրավիրում այս խնդրի վրա»,- ասաց նա:

Դ. Խաժակյանն ասաց, որ երկու տարի է հաստիքացուցակներում ավելացումներ լինում են, բացի շինարարության բլոկից,  որտեղ ծանրաբեռնվածությունը կա և օբյեկտիվ է:

Հ. Մարությանն ասաց, որ շատ արդիական խնդիր է, այժմ աշխատում են հենց ճարտարապետության ոլորտում հաստիքացուցակի փոփոխության վրա, շուտով կներկայացվի ավագանու դատին: Նա նաև հայտնեց, որ օրենքի փոփոխության պատճառով ինքնակամ շինությունների հարցով ստացել են  27 հազար դիմում: