Բլեյանի դպրոցին հարակից «բազմաչարչար» մանկապարտեզը ցանկապատ կունենա

Հասարակություն 18:21 09/02/2021 Հայաստան

Երևանի ավագանու նիստում «Լույս» խմբակցության անդամ Անի Խաչատրյանը հետաքրքրվեց, թե արդյոք մանկապարտեզների հիմնանորոգման նախագծի մեջ ներառվում է Աշոտ Բլեյանի դպրոցին հարակից «բազմաչարչար» մանկապարտեզը:

«Քանի որ այն դրվել է վերանորոգման, արդյո՞ք վերանորոգումից հետո մանկապարտեզի այդքան շոշափված ցանկապատը լինելու է, թե ոչ»,- հարցրեց ավագանու ընդդիմադիր անդամը:

Քաղաքապետ Հայկ Մարությանն ասաց, որ փոխքաղաքապետ Գայանե Մելքոմ Մելքոմյանը հիմա մանկապարտեզների հերթագրման խնդիրներով է զբաղված, քիչ անց կմոտենա և կանդրադառնա այդ հարցին:

Անի Խաչատրյանը դիմեց քաղաքապետին. «Դուք ասեք, պարոն քաղաքապետ, լինելո՞ւ է ցանկապատը, թե՞ ոչ, օրենքով սահմանված ցանկապատը»:

Հ. Մարությունը պատասխանեց. «Ես ցանկապատերով չեմ զբաղվում, ես այստեղ զբաղվում եմ, որ օրենքով ինչ-որ պետք է լինի, իրականանա, եթե օրենքով սահմանված է, ապա այո, դա պետք է լինի, հաստատում եմ»:

«Ես իմ «այո»-ն ստացա»,- արձագաքեց Անի Խաչատրյանը:

Հիշեցնենք, որ դեռ 2019 թվականին «Մխիթար Սեբաստացի» կրթահամալիրի տնօրեն Աշոտ Բլեյանը տեղեկացրել էր Երևանի թիվ 93 մանկապարտեզի և կրթահամալիրի Հյուսիսային դպրոցի-Գեղարվեստի միջև ցանկապատի շինարարության մասին: Մանկապարտեզի տարածքը պետք է ցանկապատվի, սակայն հարևանությամբ գործող «Մխիթար Սեբաստացի» կրթահամալիրի տնօրենը, սաները, աշխատակիցները դեմ են:

Ավելի վաղ Երևանի արդեն նախկին փոխքաղաքապետ Տիգրան Վիրաբյանը հայտնել էր, որ գոյություն ունի ենթաօրենսդրական ակտ, որը պարտավորեցնում է համայնքային իշխանությանը՝ երեխաների անվտանգության նկատառումով ցանկապատել նախակրթական հաստատության տարածքը, ինչը և արվում է խնդրո առարկա տարածքում:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: