Ձեր վստահելի աղբյուրը

Բանակի նախկին ղեկավար, Եվրոպական խորհրդարանում Էստոնիայի պատգամավոր Ռիհո Թերասը հայտարարել է, որ ինքը և ևս 50 եվրախորհրդարանականներ իրենց ստորագրությունն են դրել մի նամակում, որով կոչ են անում ԵՄ անվտանգության և արտաքին քաղաքականության հարցերով բարձր ներկայացուցիչ Ժոզեպ Բորելին հրաժարական ներկայացնել՝ նախորդ շաբաթ Մոսկվա կատարած այցի ժամանակ «նվաստացվելուց» հետո։

Եվրոպական ժողովրդական կուսակցության էստոնացի պատգամավոր Ռիհո Թերասը վրդովված է Բորելի՝ Մոսկվա կատարած ուղևորությունից: Բորելը Ռուսաստանի մայրաքաղաքում էր Կրեմլի քննադատ Ալեքսեյ Նավալնիի բանտարկությունից օրեր անց:

Մինչ Բորելը հանդիպում էր Ռուսաստանի իր գործընկեր Սերգեյ Լավրովի հետ, Մոսկվան վտարեց եվրոպացի երեք դիվանագետների՝ Նավալնիի կողմնակիցների ցույցերին մասնակցելու համար:
«Այցն ինքնին կատարյալ աղետ էր», - ասել է Թերասը՝ Euronews-ին տված հարցազրույցում:

Ուրբաթ օրը Բորելի և Լավրովի մամուլի ասուլիսից հետո, Թերասը պատրաստել է խիստ քննադատական նամակ` ուղղված Եվրահանձնաժողովի նախագահ Ուրսուլա ֆոն դեր Լեյենին` խնդրելով նրան «քայլեր ձեռնարկել, եթե պարոն Բորելը չհեռանա ինքնակամ»:

Թերասը պնդում է, որ Բորելը «բազմիցս չկարողացավ պաշտպանել Եվրամիության շահերը» և կեղծ հայտարարություններ արեց ԵՄ պատժամիջոցների վերաբերյալ:

Թերասը նաև դատապարտում է նրան Sputnik V-ին՝ COVID-19 ռուսական պատվաստանյութին, հավանություն տալու և ԵՄ «հիմնական դաշնակից ԱՄՆ-ի վրա հարձակվելու համար՝ Կուբայի հարցով»:

«Ռուսաստանը ցույց տվեց հնարավոր ամեն ինչ՝ նվաստացնելու ԵՄ բարձրագույն դիվանագետին։ Ես հասկանում եմ, որ դուք ուզում եք երկխոսել: Բայց եթե մեկը սառույցի հոկեյ է խաղում, մյուսը չի կարող գեղասահք պարել: Եվ դա տեղի ունեցավ Մոսկվայում. Ռուսաստանի արտաքին գործերի նախարարը նվաստացնում էր պարոն Բորելին», - ասել է Eurosews-ին Թերասը:

Եվրախորհրդարանի պատգամավորը կարծում է, որ Բորելը պետք է հետևի առևտրի նախկին եվրահանձնակատար Ֆիլ Հոգանի օրինակին, որը հրաժարական տվեց օգոստոսին Իռլանդիայում գոլֆի ընթրիքին մասնակցելուց հետո, որը խախտում էր կորոնավիրուսի սահմանափակումները: Թերասը կարծում է, որ Հոգանը «շատ ավելի քիչ հանցագործություններ» է գործել, քան Բորելը:

Այնուամենայնիվ, Տերրասը խոստովանում է, որ դժվար է հրաժարվել այնպիսի կարևոր պաշտոնից, ինչպիսին է Արտաքին գործերի գերագույն ներկայացուցչի պաշտոնը, որը նաև Եվրահանձնաժողովի փոխնախագահ է: