Ձեր վստահելի աղբյուրը

Երևանի քաղաքապետարանի աշխատակազմի «Քարտուղարություն» և «Անձնակազմի կառավարման բաժին» ստորաբաժանումներում առաջարկվող փոփոխությունները Երևանի ավագանու «Լույս» խմբացության անդամ Դավիթ Խաժակյանի մոտ բովանդակային առումով շատ վիճահարույց հարցեր չի առաջացրել, սակայն հաստիքացուցակների թվի ավելացումը,  դրանից բխող ծախսերը քաղաքի վրա արդարացված չեն:

«Կարծում եմ՝ սա պետք է լինի ավագանու համար կարմիր գիծ»,- ավագանու նիստի ժամանակ ասաց Դ.Խաժակյանը:

Նա նշեց, որ մշտապես  խոսվել է հաստիքացուցակների  ուռճացված լինելու մասին, պետք է գնան այն օպտիմալացնելու ճանապարհով, իհարկե, ունենալով փոխըմբռնում,  որ որոշ ստորաբաժանումներում կա ավելացման անհրաժեշտություն:

«Իմ տպավորությամբ կոնսենսուսն այն էր, որ մենք պետք է գնանք նվազեցման միտումով, հիմա հակառակն ենք տեսնում: Այս երկու տարիներին անընդհատ ավելացնում ենք, համարում ենք, որ ավելացումը հիմնավոր է:

Կարծում եմ՝ խնդիրը հետևյալը պետք է լիներ՝ կատարել կառուցվածքային փոփոխություններ, բայց չնպաստել թվաքանակի ու դրանից բխող ծախսերի ավելացմանը: Այսինքն ունենք 10 միլիարդի կրճատում մեր համայնքայից բյուջեից, բայց տարեկան 32 միլիոն ավելացնում ենք այս 10 հաստիքի ավելացման համար»,- նշեց ավագանու ընդդիմադիր անդամը:

Նրա խոսքով, այս նախագծի ներկայացման ժամանակ նշվեց, որ ավելացել են թեժ գծի ու դիմումների քանակը: 

«Բայց առաջարկում եմ նայել, թե ինչու են մեծացել, որ ստորաբաժանումներից եկող  խնդիրների պատճառով է, որ մարդիկ ավելի շատ ստիպված են լինում զանգել թեժ գիծ:
Թեժ գծով բողոքներ են ստացվում: Եթե մարդիկ սկսում են շատ զանգահարել թեժ գիծ, չի նշանակում, որ պետք է թեժ գծի աշխատանքն ավելի արդյունավետ դարձնենք, այլ նայենք խնդիրը, ինչու են մարդիկ բողոքում, տվյալ ստորաբաժանման խնդիրները լուծենք:

Թեժ գիծը կամ փաստաթղթերի ընդունումը կդառնա արդյունավետ այս նախագծի ընդունմամբ, բայց միևնույնն է՝ խնդիրը, որով մարդը դիմում է, մնում է  բաց:

Մենք այս փոփոխություններին կկարողանայինք անդրադառնալ համակարգայնության կոնտեքստում, դրա համար կառաջարկեի, որ այս քննարկումը տեղի ունենար բազմաթիվ այլ ստորաբաժանումների օպտիմալացման  կոնտեքստում»,- ասաց Դ. Խաժակյանը:

Նախագծում նշվում է. «Աշխատակազմի քարտուղարությունը հանդիսանում է աշխատակազմի կառուցվածքային և առանձնացված ստորաբաժանումներում ներքին գործավարության ճիշտ կազմակերպման և վարման, գործավարական միասնական համակարգի հսկողության իրականացման պատասխանատու ստորաբաժանում: Ստորաբաժանումը ի զորու չէ ներկայիս կառուցվածքով կանոնադրական գործառույթներն իրականացնել արդյունավետորեն և աշխատակազմում 2018 թվականից հետո ընկած ժամանակահատվածում մուտքագրված փաստաթղթերի կտրուկ աճով (2018թ-ին՝ 179329, իսկ 2020թ-ին՝ 226950) տարբերությունը՝ 47621 փաստաթուղթ/ և քաղաքացիներից «Թեժ գիծ» համարվող հեռախոսահամարներով ստացվող բազմաբնույթ տեղեկատվության ահռելի աճով (2018թ.-ին՝ 82708, 2019թ.-ին՝ 175226, 2020թ.-ին՝ 186749 հեռախոսազանգ), ինչպես նաև աշխատակազմ նրանց այցելությունների հոսքի ավելացմամբ պայմանավորված, նրանց «Մեկ պատուհան» սկզբունքի կիրառմամբ օրենսդրությամբ սահմանված ժամկետներում մատուցել առավել որակյալ ծառայություններ: Այդ կապակցությամբ անհրաժեշտ է ամբողջությամբ վերանայել և բարեփոխել ստորաբաժանման գործունեության ռազմավարությունը»:

Քննարկվող նախագիծն ընդունվեց 31 կողմ, 3 դեմ, 10 ձեռնապահ ձայների հարաբերկցությամբ: