Ձեր վստահելի աղբյուրը

ԱԺ անկախ պատգամավոր Սերգեյ Բագրատյանը հայտարարությունների ժամին ունեցած ելույթում  տեղեկացրեց, որ հանգստյան օրերին հանդիպել է զոհվածի ընտանիքի անդամներին, որոնք մտահոգված էին գումարների ուշացումով:

«Ստացել էին ընդամենը 700 հազար դրամ և այն 10 մլն-ը, որը նախատեսված էր, մինչև օրս որևէ առաջընթաց կամ որևէ հիմնավորում չունեին թե ինչու չեն ստացել»,- հայտարարեց պատգամավորը և հայտնեց, որ քաղաքացիները իրավական օգնության և այլ հարցերով բազմաթիվ պատկան դռներ են թակել և պատասխան չեն ստացել:

Նրա խոսքով, անհետ կորած զինվորի՝ Արթուր Հարությունի Ղարիբյանի ճակատագրով զբաղվող ընտանիքին պատկան մարմինները բավարար հետևողականությամբ չեն օգնում, խնդրի լուծմանը հետամուտ չեն լինում:

Սերգեյ Բագրատյանը վիրավոր զինվորին՝ Սերոբ Ղարիբյանին այցելելիս պարզել է, որ նրա երիկամը հեռացրել էին, և տվել 3-րդ կարգի հաշմանդամություն:

«Այդ կարգի հաշմանդամություն ունեցողներն ամսական ստանում են ընդամենը 20 հազար 500 դրամ դրամական օգնություն՝ թոշակ, որը, վստահ եմ, բավարար չէ այդ ընտանիքի կենսական խնդիրները լուծելու համար»,- հայտնեց պատգամավորը:

Բագրատյանը հայտնեց, որ մեկ այլ քաղաքացի բանակ է մոբիլիզացվել անձնական մեքենայով, որը հրթիռակոծվել է և նա չի կարողանում որևէ կերպ փոխհատուցում ստանալ, իսկ այն տվյալ ընտանիքի միակ կերակրող գործիքն է, որի միջոցով ընտանիքը կարողանում էր ապրել:

«Ամփոփելով այս 4 այցը՝ եկա այն եզրակացության, որ օպերատիվ շտաբը կազմակերպչական լուրջ թերացումներ ունի այս աշխատանքների կազմակերպման գործում»,- ասաց պատգամավորը և առաջարկեց համայնքապետարաններին հանձնարարել, որ իրենց աշխատակիցների միջոցով այցելեն զինվորականների բնակարանները, փաստաթղթերը հավաքեն և փոխանցեն օպերատիվ շտաբին: