Ձեր վստահելի աղբյուրը

Ջերմուկում բնակչության շրջանում Ամուլսարի տարածքում մետաղական բաց հանքի շահագործման հարցում դիրքորոշում չի փոխվել՝ ջերմուկցիների մեծ մասը Ամուլսարը դիտարկում է ոչ թե եկամտի աղբյուր, այլ կենսատարածք։

«Մենք բոլորս էլ գիտակից մարդիկ ենք, հասկանում ենք, որ պատերազմից, համավարակից հետո տնտեսությունն առավել ծանր վիճակում է, բայց նաև հասկանում ենք, որ սահմանների փոքրանալուց հետո Ամուլսարն այլևս կենսատարածք է, ու մենք չենք տեսնում մեր տնտեսական շահը Ամուլսարի ընդերքում: Այստեղ մեր ապրելու, գոյատևելու տեղն է: Հայաստանի այսօրվա քարտեզն ուղղակի թույլ չի տալիս երկրի կենտրոնում այդ մասշտաբի բաց հանք լինի: Բա մենք որտե՞ղ գնանք, ապրենք: Ուղղակի տարածք չկա»,- Panorama.am-ի հետ զրույցում ասաց Ջերմուկի բնակիչ Շիրակ Բունիաթյանը:

Նրա խոսքով, վերջին երեք տարիներին իշխանության հայտարարություններն իրարից չեն տարբերվում, հանքի շահագործումը դիտվում է որպես ներդրումային ծրագիր:

«Եթե խոսքը գնում է ներդրումներից, ներդրումների պաշտպանվածությունից, Ջերմուկում կան բազմաթիվ ներդրումներ: Եթե խոսվում է հավասարակշռված շահից, ուրեմն պետական մարմինները պարտավոր են նաև մյուս ներդրողների շահերն ու իրավունքները պաշտպանել: Այսօր նույնիսկ հանքը շահագործել պատրաստվող ընկերությունը երաշխիքներ չի ներկայացրել, որ իրենց գործունեության հետևանքով մյուս ոլորտները չեն տուժելու:

Իսկ մենք, ունենալով բազմաթիվ օրինակներ, որ հանքարդյունաբերությունն ու առողջարանային, զբոսաշրջային ոլորտներն իրար հետ անհամատեղելի են, արդեն իսկ պատկերացում ենք կազմում, որ հանքի շահագործման դեպքում մյուս ոլորտները տուժելու են»,- ասաց նա:

Շիրակ Բունիաթյանը հիշեցրեց՝ Ջերմուկում շուրջ 75 տարի ներդրված է առողջարանային և զբոսաշրջային ոլորտը, և միանգամից այդ ամենը կողք դնել, որպեսզի հանք շահագործվի, կարճաժամկետ ներդրում արվի, տնտեսապես, նաև իրավունքի տեսանկյունից անթույլատրելի է:

«Իրենք լավ հասկանում են հարցի խորությունը, բայց հանրության համար իրենց ելույթների ժամանակ փորձում են ներկայացնել, որ սա ուղղակի խնդիր է բնապահպաների ու կառավարության միջև: Բայց դա այդպես չէ: Հարցն ավելի խորքային է, ժամանակին այստեղ հանրային լսումներ չեն անցկացվել, Ջերմուկի բնակչության կարծիքը հաշվի չի առնվել, խախտվել է այդ մարդկանց իրավունքը:

Հեղափոխություն եղավ, չնայած դրանից հետո կառավարությունը տապալեց հեղափոխության գաղափարախոսությունը, բայց մարդկանց մեջ է հեղափոխություն եղել, նրանք փորձում են իրենց խախտված իրավունքը վերականգնել»,- նշեց Ջերմուկի բնակիչը:

Նա ասաց, որ Ամուլսարի շահագործման դեպքում բացի բնապահպանական լուրջ խնդիրներից, նաև սոցիալական, տնտեսական, իրավունքի հետ կապված խնդիրներ կլինեն, ցանկացած տնտեսագետի հետ պատրաստ են բանավիճել ու ապացուցել, որ տնտեսագիտական տեսանկյունից էլ Ամուլսարի ծրագիրն ուղղակի անհեռանկարային է:

Նշենք, որ երկար ժամանակ Ամուլսարի հարակից շրջանների բնակիչները շուրջօրյա հսկողություն էին իրականացնում սարի շրջակայքում, սակայն 2020 թ. սեպտեմբերի վերջից՝ պատերազմը սկսվելուց օրվանից, հերթապահություն չի արվում:

«Մեզանից շատերը կամավոր գնացին պատերազմ: Ճանապարհներին շուրջօրյա հերթապահություն չկա, բայց շրջիկ ձևով բնակչությունը տարածքը հսկողության տակ է պահում: Տարածքում միայն «Լիդիանի» կողմից բերված պահնորդներն են: Իսկ պահնորդների հարցում մենք առաջին օրից առարկությունի չենք ունեցել, քանի որ այնտեղ կա գույք, պետք է հսկել»,- ասաց Շիրակ Բունիաթյանը: