Ձեր վստահելի աղբյուրը

ԱՄՆ սենատորներ Ռոն Ուայդենը (դեմոկրատ) և Մարկո Ռուբիոն (հանրապետական) Բայդենի նոր վարչակազմին հորդորում են ճնշում գործադրել Թուրքիայի կառավարության վրա՝ բարելավելու մարդու իրավունքների իր դիրքերը, ասելով, որ այլախոհության դեմ կիրառվում է ավտորիտար ճնշում, ինչպես երկրի ներսում, այնպես էլ արտերկրում:

Ավելի քան 50 սենատորների կողմից ստորագրված երկկուսակցական նամակում նշվում է Թուրքիայի նախագահ Ռեջեփ Թայիփ Էրդողանի կողմից ներքին ընդդիմությանը մարգինալացնելը, քննադատող լրատվամիջոցներին լռեցնելը կամ համագործակցելու մղելը, անկախ դատավորներին հեռացնելը, նրանց կուսակցական հավատարիմներով փոխարինելը և բազմաթիվ լրագրողների բանտարկելը:

«Նախագահ Էրդողանի արտաքին քաղաքականությունը նույնպես ժամանակի ընթացքում ավելի ռազմատենչ և մարտական է դարձել: Վերջին տարիներին նա լկտիորեն հարձակվեց Սիրիայում ԴԱԵՇ-ի դեմ պայքարող ԱՄՆ-ի աջակցությամբ գործող քրդերի վրա, նա գնեց ռուսական հակաօդային պաշտպանության համակարգեր, չնայած նախազգուշացումներին, որ դրանք անհամատեղելի են ամերիկյան տեխնոլոգիայի հետ, և նա խրախուսեց Ադրբեջանին բռնություն գործադրել`Հայաստանի հետ տարածքային վեճը լուծելու համար։

Նախագահ Էրդողանը նաև փորձել է ճնշել ԱՄՆ-ին և այլ երկրներին՝ արտահանձնելու Թուրքիայի այն քաղաքացիներին, որոնց նա մեղադրում է 2016-ի ձախողված հեղաշրջման մեջ: Էրդողանի կառավարությունը փորձել է լռեցնել ԱՄՆ-ում իրեն քննադատողներին, ինչպիսիք են NBA-ի խաղացող և մարդու իրավունքների պաշտպան Էնես Կանտերին՝ հետապնդելով Թուրքիայում գտնվող նրա ընտանիքին»,- գրել են սենատորները։

Սենատորները նշում են, որ Միացյալ Նահանգները նշանակալի հնարավորություն ունի ազդելու Թուրքիայի մարդու իրավունքների անհանգստացնող արդյունքների վրա, քանի որ այն կարևոր դաշնակից է աշխարհի կարևոր տարածաշրջանում:

«Մենք ձեզ հորդորում ենք շեշտել Նախագահ Էրդողանին և նրա վարչակազմին, որ նրանք անհապաղ պետք է դադարեցնեն այլախոհությունների դեմ ճնշումը տանը և արտերկրում, ազատ արձակեն քաղբանտարկյալներին և խղճի բանտարկյալներին և հետ կանգնեն իրենց ավտորիտար ընթացքից»,-ասվում է նամակում։