Ձեր վստահելի աղբյուրը

«Ուսանողն է այն բարձր պաշտոնյան, ում առջև հաշվետու է դասախոսական կազմը»,- այսօր խոհրդարանում «Բարձրագույն կրթության և գիտության մասին» և կից ներկայացված օրենքների նախագծերի փաթեթի քննարկման ժամանակ ասաց անկախ պատգամավոր Գոռ Գևորգյանը։

Նրա խոսքով, ուսանողի համար շատ կարևոր է կրել տվյալ բուհի բրենդը, ներկայանալ հանրությանը՝ որպես կոնկրետ բուհի «պաշտոնյա»։

«Դուք, պարո՛ն նախարար, այս ծանր շրջանում ստանձնել եք ԿԳՄՍ նախարարի հույժ կարևոր պարտականությունները, և ես կարծում էի, որ դուք այսօր հայեցակարգային գնահատական կտայիք առնվազն վերջին 2-2.5 տարիներին, որոնց ընթացքում, կարծում եմ, որ բարձրագույն կրթության ոլորտում խութեր են թողնվել։ Եվ դուք, կարծում եմ, պետք է խոսեիք, ինչը և կապահովեր ինտելեկտուալ ազնվության հարթակում մեր բոլորի ներդաշնակությունը։

Պարո՛ն նախարար, ես ուզում եմ, որ մենք բոլորս այստեղ հասկանանք՝ լիազոր մարմինը քաղաքական պաշտո՞ն է, թե՞՝ ոչ։ Ես ավելի քան վստահ եմ, որ դա քաղաքական պաշտոն է»,- նշեց Գոռ Գևորգյանը։

Ըստ նրա, եթե լիազոր մարմինը նշանակում է բուհի ռեկտոր, ապա նշանակում է, որ դա ևս լինելու է քաղաքական։

«Եթե դուք կարողանաք հիմնավորել, թե պայմանական ընտրված երեք թեկնածուներից դուք ինչ չափորոշիչով եք ընտրելու այդ մեկ՝ վերջնական ընտրյալին, ես Ձեզ հետ կհամաձայնեմ, բայց ցավոք սրտի, մեր իրականությունը և մեր ներդրումները թույլ չեն տալիս, որ մենք զերծ մնանք ենթատեքստերից։ Ես կարծում եմ, որ բուհերում պետք է միանշանակ ապահովվի ընտրական մարմինների հավասարությունը՝ իրենց ընտրության նկատմամբ անաչառության շրջանակում, և պետք է արվի հնարավորինս, որ մենք հստակ հասկանանք՝ ի վերջո բուհն ամբողջությամբ պետության կառավարմա՞ն տակ է գտնվում, թե՞՝ ընդհակառակը»,- ասաց պատգամավորը։

Ըստ նրա, պետք է հասկանալ նաև, որ գիտությունն այն ոլորտն է, որի վրա չի կարելի տնտեսել, գիտության վրա պետք է ծախսել ամեն ինչ։

«Հիմա կարող ենք ամրագրել՝ այնպես է ստացվել, որ ՀՀ-ում գիտության գեներացիան կատարվում է ԳԱԱ-ում, և այնտեղ է գիտական խորհուրդների մեծ մասը, մեր գիտնականները»,- նկատեց պատգամավորը։

Նրա խոսքն ընդհատեց ԿԳՄՍ նախարար Վահրամ Դումանյանը՝ նշելով, որ այդպես չէ։

Գոռ Գևորգյանն էլ արձագանքեց. «Եթե ոչ ամբողջությամբ, ապա մեծամասամբ այդպես է, ԳԱԱ-ում է գեներացվում»։

Սակայն այս անգամ էլ ԿԳՄՍ նախարարն ընդհատեց պատգամավորին, և ասաց, որ պետք է թվերին նայել։

Գոռ Գևորգյանն էլ պատասխանեց՝ ասելով, որ չի ուզում բանավեճի մեջ մտնել նախարարի հետ։

«Ես ինքս էլ այդ ամենը գիտեմ, քանի որ ոլորտին ներսից եմ ծանոթ»,- ասաց Գոռ Գևորգյանը, սակայն չկարողացավ շարունակել խոսքը։ Վահրամ Դումանյանն այս անգամ էլ, պատգամավորին ասաց. «Օդից բաներ եք խոսում»։

Ի պատասխան՝ Գոռ Գևորգյանն ասաց. «Ես օդի մեջ բաներ չեմ խոսում, հարգալի՛ց եղեք։ Եկե՛ք հարգենք իրար»։

ԿԳՄՍ նախարարն էլ նեղսրտած վրա բերեց. «Այդ դեպքում ինչո՞ւ եք ինձ նայում ու մեղադրում»։

Գոռ Գևորգյանն էլ արձագանքեց. «Ձեզ եմ նայում ու դիմում, քանի որ դուք եք ներկայացրել նախագիծը, բայց խոսում եմ համակարգային խնդիրներից։ Որևէ անձնական հարց չկա, ես երբեք որևէ անուն չեմ տվել, այլ միշտ խոսել եմ համակարգի խնդիրներից»։

Ապա, շարունակելով խոսքը, պատգամավորն ասաց, որ պետք է ավելի մեծ ուշադրություն դարձնել ԳԱԱ-ին, պետք է մեծ գումար հատկացնել գիտությանը, քանի որ հակառակ դեպքում այն չի զարգանա։

«70-80 հազար ստացող գիտաշխատողն այսօր պրոդուկտ է ստեղծում, որը տպվում է տարբեր միջազգային ամսագրերում, բայց այսօր գիտնականը ՀՀ-ում իրացվելիություն չի գտնում, դրա համար ստիպված լքում է երկիրը»,- եզրափակեց խոսքը Գոռ Գևորգյանը։