Ձեր վստահելի աղբյուրը

«Հիմա ինչ է ստացվում, որ մի բդեշխին փոխարինում ենք մյուս բդեշխով և նախկին արատավոր պրակտիկան նորից կիրառո՞ւմ եք»,- «Բարձրագույն կրթության և գիտության մասին» օրենքի նախագծի քննարկման ժամանակ, հիշատակելով բդեշխների մասին ԿԳՄՍ նախկին նախարարի հայտնի խոսքերը՝ Վահրամ Դումանյանին հարցրեց «Իմ քայլը» խմբակցությունը լքած Թագուհի Թովմասյանը:

Վերջինս հիշեցրեց, որ Արայիկ Հարությունյանը, անդրադառնալով բուհերի խորհուրդների նախագահների խնդրին, ասել էր, որ ժամանակին բդեշխ են նշանակել, որը կարողացել է ԵՊՀ-ում ռեկտոր ու պրոռեկտոր նշանակել:

Պատգամավորը հայտարարեց, որ նախագիծը պարունակում է ռիսկեր, մի շարք օրենքների խախտումներ, այդ թվում նաև մայր օրենքի՝ Սահմանադրության, որի առաջ չեն կարող աչք փակել:

Հիշատակելով, որ Նիկոլ Փաշինյանն էլ ժամանակին հայտարարում էր՝ բուհերը և դպրոցները կուսակցականացված են՝ Թագուհի Թովմասյանը շեշտեց, որ նույն գործընթացը ներկայում է ընթանում:
 
«Այս ընթացքում ԵՊՀ ռեկտոր չի հաջողվել նշանակել որևէ մեկին, այդ թվում՝ նաև Ձեզ, պարոն Դումանյան, թեև կառավարությունը դրա ցանկությունը բազմիցս բուռն դրսևորեց: Բայց դուք «վշտից» նախարար դարձաք և հիմա ուզում եք ունենալ գրպանային ռեկտորներ, ինչն անթուլատրելի է»,- հայտարարեց Թովմասյանը և ընդգծեց, որ որևէ իրավիճակի լուծման պետք չէ հասնել համակարգի ոչնչացման գնով:

Պատգամավորը նաև հայտնեց՝ իրեն տեղեկություններ են հասել, որ մի շարք ռեկտորներ նախարարին են ուղարկել երկու տասնյակից ավելի առաջարկություններ, բայց նա որևէ մեկը չի ընդունել:

Նրա հավաստիացմամբ՝ կա նաև տեղեկություն, որ նախագիծը գաղտագողի են անցկացրել:

Թովմասյանը հայտնեց, որ ինքը պատրաստվում է քննարկում կազմակերպել, որին հրավիրելու է նաև Դումանյանին:

«Խնդում եմ Ձեզ այս ամբիոնից խոստացեք, որ բուհերը քաղաքականացնելու և գրապանային ռեկտորներ ունենալու ձեր մտադրությունից հրաժարվելու եք»,- կոչով ԿԳՄՍ նախարարին դիմեց պատգամավորը: