Ձեր վստահելի աղբյուրը

«Ինձ տեղեկացրին, որ ժողովուրդ է հավաքվել՝ դպրոցականներ, ուսուցիչներ, լրագրողներ նախարարության մոտ, տեղակացրին, որ բողոքում են, զարմացա՝ ինչի՞ց են բողոքում, ընթերցեցի մամուլը, աշակերտներ էլ կային, ասում էին՝ եկել ենք, պայքարում ենք անարդարության դեմ»,- այսօր խորհրդարանում լրագրողների հետ զրույցում ասաց ԿԳՄՍ նախարար Վահրամ Դումանյանը՝ անդրադառնալով Աբովյան քաղաքի Խաչատուր Աբովյանի անվան թիվ մեկ ավագ դպրոցում կատարվող դեպքերին։

Նրա խոսքով, աշակերտներն ու ծնողները պնդում են, որ տնօրեն պետք է նշանակվի մյուսը:

«Երբ ես ծանոթացա խնդրին, իմացա, որ երկուսն էլ ստացել են 4-ական ձայն, առաջին ցանկությունը, որ առաջացավ, այս մրցույթը չկայացած ճանաչելն էր, բայց ինձ ասացին, որ գործող կարգը դա թույլ չի տալիս և պետք է երկուսից մեկին հրամանագրել»,- ասաց նախարարը։

Դիտարկմանը, որ Աբովյանի դպրոցի նոր տնօրենի անունը կապվում է Ռոմանոս Պետրոսյանի կնոջ հետ, ասում են՝ ընկերուհին է, նախարարն արձագանքեց, թե ինքը տեղյակ չէ՝ ով ում հետ ու ինչպես է կապվում, նման տեղեկություն չունի ու իրեն հետաքրքրիր էլ չէ:

Ճշտող հարցին՝ այսինքն՝ իրեն հետաքրքիր չէ՞, որ Ռոմանոս Պետրոսյանի կնոջ ընկերուհին է դարձել դպրոցի տնօրեն, կամ Գյումրու 25 դպրոցի դեպքում էլ ասում են, որ Տիգրան Ավինյանն իր ցանկությամբ է տնօրեն նշանակել, Վահրամ Դումանյանը պատասխանեց. «Դուք իմ փոխարեն մի որոշեք ինձ հետաքրքրեց, թե չհետաքրքրեց: Դուք ինձ տանում եք անձնական հարաբերությունների դաշտ, իսկ անձնական հարաբերությունների դաշտն ինձ հետաքրքրիր չէ»:

Միևնույն ժամանակ, նախարարը վստահեցրեց, որ համակարգում չկա հովանավորչություն, չկան կոռուպցիոն սխեմաններ:

«Իհարկե, հիմնավոր չեն այդ դժգոհությունները, որովհետև ամեն ինչ արվել է օրենքի համաձայն, իսկ եթե որոշ մարդիկ համարում են, որ եղել է անօրինականություն, թող գնան իրավական ճանապարհով, թող դիմեն, իրավական լուծումներ ստանան, միայն կողջունենք նման որոշումը, բայց գալ ու նման ձևերով փորձել ճնշում գործադրել նախարարի կամ նախարարության, աշակերտության վրա, չի կարելի»,- կարծիք հայտնեց Վահրամ Դումանյանը։

Դիտարկմանը, որ տնօրենի նոր ընտրություն կատարելու պահանջով՝ Աբովյանի թիվ մեկ դպրոցում աշակերտները դասադուլ են անում, և արդյունքում՝ խախտվում է երեխաների կրթության իրավունքը, ԿԳՄՍ նախարարն արձագանքեց, նշելով, որ այդ ամենին նախարարությունը հետևում է։

«Մեր համար գերակա շահ է երեխաների կրթության իրավունքը, նրանք կստանան իրենց կրթությունը՝ ինչ ձևով էլ լինի։ Բայց այդ դասադուլների համար կազմակերպիչները պատասխանատվություն են կրում»,- նկատեց նա։