Ձեր վստահելի աղբյուրը

Սեպտեմբերի 9-13-ը Հայաստանում կանցկացվի «Հայաստանը խաղաղության խաչմերուկում» չոր­րորդ միջազգային ֆոլկլորային փառատոնը, որին կմասնակցեն ավանդական երգի-պարի և նվագարանային երաժշտության խմբեր Հայաստանից, Բուլղարիայից, Իրանի Իսլամական Հանրապետությու­նից, Հնդկաստանից: Այս մասին հայտնում են ՀՀ մշակույթի նախարարությունից: 

Երևանից կմասնակցեն «Տոնացույց», «Տարոնցիներ», «Ակունք», «Սասուն», «Մասունք», «Վարք հայոց», Նարեկացի արվեստի միության ժողովրդական գործիքների, Բյուրականից` «Կաթնաղբրիկ», «Խնդում», Ուջանից` «Կարոտ», Ներքին Բազմաբերդից` «Գորանի» խմբերը, Սասունիկի և Աշնակի ազգագրական համույթները, Աշտարակի Ն. Սիսակյանի անվան, Բյուրականի Հ. Թումանյանի անվան և Անտառուտի միջնակարգ դպրոցների սաները: Փառատոնին կմասնակցեն նաև Բուլղարիայից` «Նյուանս», Հնդկաստանից` «Բոբբիդանս» ազգային պարի, Իրանի Իսլամական Հանրապետությունից` «Ռահավարդե Պարսիան» ժողովրդական գործիքների խմբերը:

Փառատոնի բացման արարողությունը տեղի կունենա սեպտեմբերի 9-ին Բյուրականի Հ. Թումանյանի անվան դպրոցում: 

Սեպտեմբերի 12-ին Աշտարակի Պ. Պռոշյանի տուն-թանգարանում կկայանա ժողովրդական ավանդական կենցաղի և ազգային ծեսերի ցուցադրում, կլինի երգ ու պար: Եեզրափակիչ համերգը կկայանա սեպտեմբերի 13-ին Երևանի Առնո Բաբաջանյանի անվան համերգային դահլիճում:

Փառատոնի ընթացքում տեղի կունենան մի շարք միջոցառումներ` համերգներ, երթեր, ցուցահան­դեսներ: Իսկ մասնակից խմբերի համար կկազմակերպվի ճանաչողական այցելություններ Հայաստանի պատմամշակութային վայրեր:

Փառատոնի կազմակերպիչն է «Ավանդական տոների վերածնունդ» կրթամշակութային հասարակական կազմակերպությունը: Փառատոնն անցկացվելու է  ՀՀ մշակույթի նախարարության աջակցությամբ: 

Արդեն ավանդական դարձած «Հայաստանը խաղաղության խաչմերուկում» փառատոնը միտված է ազգային ավանդական մշակույթն իր բուն՝ կրողների միջավայրում ներկայացնելուն: Դրա իրականացումը մեծապես նպաստում է գյուղական համայնքների մշակութային կյանքի աշխուժացմանը, միջազգային մշակութային երկխոսության խթանմանը և ազգային մշակույթի հանրահռչակմանը: