Ձեր վստահելի աղբյուրը

ԱԺ հերթական նիստի ավարտին քվեարկության դրված վերջին 9 օրենքի նախագծերից պատգամավորները չընդունեցին միայն «Մարդու իմունային անբավարարության վիրուսից առաջացած հիվանդության կանխարգելման մասին» օրենքում փոփոխություններ և լրացում կատարելու մասին նախագիծը:

Նույն օրենքի փաթեթում ընդգրկված էր նաև Քրեական օրենսգրքում փոփոխություն կատարելու մասին նախագիծը:

Վերոնշյալ նախագծերով առաջարկվում էր ուժը կորցրած ճանաչել օրենքի այն դրույթը, որով սահմանվում էր, որ բնակչության ՄԻԱՎ/ՁԻԱՀ-ի կանխարգելման և մոնիթորինգի նպատակով գործում է ՁԻԱՀ-ի կանխարգելման հանրապետական կենտրոնը:

Քրեական օրենսգրքում փոփոխություն կատարելու մասին նախագծով նախատեսվում էր ՄԻԱՎ-ի փոխանցման համար պատասխանատվություն սահմանել միայն այն դեպքերում, երբ անձը տեղեկացված է իր մոտ առկա ՄԻԱՎ հիվանդության մասին, գործում է կանխամտածված` դիտավորությամբ կամ ինքնավստահությամբ և փաստացի փոխանցում է ՄԻԱՎ:

Նույն նախագծով առաջարկվում էր հանել օրենսգրքի 123-րդ հոդվածի առաջին մասը, որով սահմանված է պատասխանատվություն մարդու իմունային անբավարարության վիրուսով վարակելու ակնհայտ վտանգի ենթարկելու դեպքերի համար՝ հիմնավորելով, որ անորոշ է «Ակնհայտ վտանգ» ձևակերպումը:

ԱԺ-ն քվեարկությամբ ընդունեց հետևյալ օերնքները.

Հայաստանի Հանրապետության քաղաքացիական օրենսգրքում փոփոխություններ կատարելու մասին (առաջին ընթերցմամբ),

«Հանրագրերի մասին» Հայաստանի Հանրապետության օրենքում փոփոխություններ և լրացումներ կատարելու մասին (առաջին ընթերցմամբ),

Բանկային ավանդների ներգրավման մասին» օրենքում փոփոխություն կատարելու մասին (առաջին ընթերցմամբ),

Հայաստանի Հանրապետության քրեական օրենսգրքում փոփոխություններ կատարելու մասին(առաջին ընթերցմամբ),

«Առևտրի և ծառայությունների մասին» Հայաստանի Հանրապետության օրենքում փոփոխություն և լրացում կատարելու մասին(առաջին ընթերցմամբ),

«Էլեկտրոնային հաղորդակցության մասին» Հայաստանի Հանրապետության օրենքում լրացումներ կատարելու մասին (առաջին ընթերցմամբ),

«Հրապարակային սակարկությունների մասին» Հայաստանի Հանրապետության օրենքում փոփոխություններ և լրացումներ կատարելու մասին (առաջին ընթերցմամբ),

«Հանրային խորհրդի մասին» օրենքում փոփոխություն կատարելու մասին (երկրորդ ընթերցմամբ) նախագծերը: