Ձեր վստահելի աղբյուրը

«Որպես նախկին լրագրող այս հարցը նաև ինձ է հետաքրքրել, կարծում եմ՝ ԱԱԾ-ն լրացուցիչ պարզաբանմամբ հանդես կգա»,- այսօր խորհրդարանական ճեպազրույցի ընթացքում ասաց ԱԺ «Իմ քայլը» խմբակցության պատգամավոր Սիսակ Գաբրիելյանը՝ անդրադառնալով հարցին, որ լրագրողները Սյունիքի սահմանային տարածքներում թեմաներ լուսաբանելու համար պետք է ստանան ՀՀ ԱԱԾ համաձայնությունը։

Նրա խոսքով, խնդիրը մոտավորապես է իրեն հայտնի, և ըստ էության, այս պահին գործընթացներ են ընթանում Սյունիքում, և պետք է շարժվել չվնասելու տրամաբանությամբ։

«Բայց միևնույն է, այնտեղ ինչ-որ պահից սկսած ազատ ելումուտ կլինի, և հետո փոքր երկիր է, այնտեղ համացանց կա, համայնքի ղեկավարների հետ էլ հնարավոր կլինի կապ հաստատել, ուստի որևէ բան թաքցնելու հարց չկա։ Բայց ոնց հասկանում եմ, դեռ որևէ լրագրողի համար սահմանափակում չի եղել, ուղղակի պետք է ԱԱԾ-ին տեղեկացնել, ապա նոր սահմանային հատվածներում նկարահանումներ անել։ Քանի որ հայտարարությունը նոր է, որևէ խնդիր չեմ տեսնում, իսկ եթե վաղը որևէ ԶԼՄ-ի այցը խոչընդոտվի, ինքս կկանգնեմ լրագրողների կողքին։ Էլի եմ կրկնում, որ զուտ չվնասելու տրամաբանությունն է գործում։ Պետք է հասկանալ, որ 21-րդ դարում ինչ լուսաբանվում է, ոչ միայն Հայաստանի լսարանի համար է, այլ նաև հարևան պետությունների համար։ Ուստի մի փոքր զգուշավորություն է պետք»,- նկատեց պատգամավորը։

Նա նաև նշեց, որ նախկինում ևս այդպիսի կարգ գործել է, և լրագրողները սահմանամերձ համայնքներ գնալիս, սահմանային անցակետերին մոտենալիս բանավոր ՊՆ-ի հետ համաձայնեցնում էին քայլերը։

Պատգամավորն անդրադարձավ նաև «Բարձրագույն կրթության և գիտության մասին» օրենքի՝ առաջին ընթերցմամբ ընդունումից հետո առաջացած հարցերին, թե արդյո՞ք Թատերական ինստիտուտը միացվելու է Մանկավարժական համալսարանին։ Նա նշեց, որ օրենքի նախագծում որևէ բուհի անուն չկա նշված, և վստահություն հայտնեց, որ ԱԺ գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի անդամները կհանդիպեն ուսանողների հետ և որոշակի պարզաբանումներ կներկայացնեն։

Ինչ վերաբերում է ՀՀ փոխվարչապետ Տիգրան Ավինյանի հայտարարությանը, թե Ադրբեջանի հետ կա ևս մեկ պայմանավորվածություն՝ Դավիթ Բեկ-Գորիս ճանապարհահատվածի վերաբերյալ, ապա Սիսակ Գաբրիելյանը նշեց.

«Նախորդ տարի դեկտեմբերի 19-ին ՊՆ-ն նման հաղորդագրություն էր տարածել, որ աշխատանքներ են տարվում։ Ինչ վերաբերում է ընդդիմադիրների կողմից տարածվող փաստաթղթին, ապա մենք կարող ենք օրը մի քանի նման փաստաթուղթ գրել, օրինակ՝ իմ աշխատասենյակում։ Տարածված փաստաթղթերը մանիպուլյացիա են»,- ասաց նա։

Նույն հարցին անդրադարձավ նաև իմքայլական պատգամավոր Հայկ Գևորգյանը։

«Գորիս-Կապան հատվածում ճանապարհի 21 կմ-ն անցնում է Հայաստանի՝ միջազգյնորեն ճանաչված սահմաններից դուրս, այսինքն՝ Ադրբեջանի տարածքով, բայց ոչ մի վայրկյան այդ ճանապարհը չի փակվել։ Դա պայմանավորվածությունների արդյունք է, և որևէ վայրկյան չի փակվել այդ ճանապարհը»,- նկատեց նա։

Հարցին՝ այսինքն Սյունիքում անհանգստացնող որևէ բան չկա՞, Սիսակ Գաբրիելյանը պատասխանեց.

«Եթե ասեմ, որ անհանգստացնող բան չկա, կխաբեմ։ Միանշանակ, Սյունիքում անհանգստացնող բան կա։ Առնվազն վերջին 25-30 տարում իրենց մոտ այն վիճակը չի եղել, ինչ հիմա է, և բնական է, որ սյունեցիների մոտ կարող է անհանգստանալու առիթ լինել»,- ասաց նա։