Ձեր վստահելի աղբյուրը

«Փետրվարի 20-ին սկսում ենք զանգվածային միջոցառումները, օրակարգը մնացել է նույնը՝ ազատվել այս դավաճան վարչապետից, կազմել ժամանակավոր կառավարություն, ապա անցկացնել ընտրություններ»,- այսօր Ազատության հրապարակում «Հայրենիքի փրկության շարժման» հանրահավաքի ընթացքում ասաց շարժման վարչապետի միասնական թեկնածու Վազգեն Մանուկյանը։

Նրա խոսքով, երկու օր առաջ մի դեպք է տեղի ունեցել, որը ստիպել է իրեն՝ դիմել ժողովրդին և մինչև փետրվարի 20-ի հանրահավաքը զրուցել նրա հետ։

Ըստ Վազգեն Մանուկյանի, պարզվել է, որ բացի նոյեմբերի 10-ի եռակողմ համաձայնագիրը, կա նաև գաղտնի ստորագրված 6 կետանոց մի փաստաթուղթ, որից պարզ է դառնում, թե ինչ է կատարվում Սյունիքում, ինչու է հայկական կողմը կորցնում իր սահմանները, ճանապարհները։

«Ոմանք ասում էին, թե իշխանությունը պարալիզացված է, չի տիրապետում իրավիճակին։ Պարզվեց՝ ոչ, պարզվեց, որ կա ևս մեկ դավաճանական փաստաթուղթ։ Եվ զարմանալին գիտե՞ք որն է՝ պատերազմն ավարտվեց նոյեմբերի 10-ի հայտարարությամբ, բայց այս 6 կետերը գնում են առաջ։ Եթե ամսի 10-ի հայտարարությունում գրված էր, որ զորքերը մնում են իրենց կանգնած տեղերում, մեր զորքը Զանգելանից և Կուբաթլուից հետ նահանջեց դեպի Սյունիք։ Դա եղավ Նիկոլ Փաշինյանի հրամանով, պարզվեց՝ նա ունի ևս մեկ գաղտնի փաստաթուղթ ժողովրդից։ Ավելին, երեկ էլ տարածվեց մի նոր հայտարարություն, որ ԶԼՄ-ներն իրավունք չունեն առանց ԱԱԾ թույլտվության գնալ Սյունիք ու պարզել իրավիճակը։ Այսինքն՝ ինչպես 44 օր մեզ խաբեցին ու տարան պարտության՝ փակելով մամուլը, նույնը հիմա անում են Սյունիքում, փակում են մամուլը»,- ընդգծեց Վազգեն Մանուկյանը։

Նա նշեց, որ իշխանությունները նոր ի հայտ եկած փաստաթղթի 6 կետերով էլ չեն բավարարվելու, էլի կան պայմանավորվածություններ։

«Ես նորից ասում եմ՝ զարթնեք, մեր հայրենիքը մեր աչքի առաջ կործանում են մինչև վերջ։ Մենք և՛ պարտվել ենք, և՛ երկիր կորցրել, բայց այսպիսի բան, որ երկրի ղեկավարը՝ առանց ժողովրդին տեղյակ պահելու ծախի պետությունը, չէինք տեսել։ Հիմա նաև խոսվում է Նժդեհի արձանի մասին, ասում  են, որ այն պետք է հանել Մարտունուց։ Ինչո՞ւ. քանի որ Նժդեհն այն մարդն էր, որ պահեց Սյունիքը։ Սյունիքի պատերազմն է գնում, իսկ Նժդեհը Սյունիքի սիմվոլն է։ Չեմ զարմանա, որ մեր իշխանությունները հանեն այդ արձանը։

Այս պայմաններում Հայաստանը ո՞նց պետք է սահմանները բացի Թուրքիայի և Ադրբեջանի հետ։ Այս պայմաններում ցանկացած պայմանագիր, որ կնքի Հայաստանը, կործանարար է լինելու հենց իր համար։ Մինչև հիմա ինչ պայմանագիր կնքել են, հանդես են եկել խեղճի վիճակից, կամ՝ դրսի թելադրանքով։ Մեզ պետք է համաժողովրդական շարժում, որ մենք կարողանանք ազատվել այս իշխանություններից։ Մենք պետք է կոտրենք այս իշխանության ոտքերը՝ իր հենարանները»,- նկատեց Վազգեն Մանուկյանը։

Նա նշեց նաև, որ պետք է ստիպել «Իմ քայլը» խմբակցության պատգամավորներին՝ լքել խմբակցությունը։ Եվ այն պատգամավորը, որը կհրաժարվի լքել խմբակցությունը, կհամարվի դավաճան։

«Եվ բոլոր նրանք, ովքեր կծառայեն այս իշխանություններին՝ հատկապես ոստիկանները, դավաճան են։ Նրանց չպետք է թույլ տանք քայլելու։ Պետք է նաև ծախուների հարցը լուծենք։ Նրանք այն տականքներն են, որ ծառայում են այս իշխանություններին՝ իրենց ծախելով։ Ագրեսիա՞ են ցուցաբերում, նույնն արեք նրանց դեմ։ Ով ձեռք բարձրացնի մեր վրա, պիտի հարված ստանա։ Ատելության դեմ ատելություն, ագրեսիայի դեմ՝ ագրեսիա։ Դա է մեր ճանապարհը»,- ասաց  նա։

Վազգեն Մանուկյանը կոչ արեց շարժման մասնակիցներին՝ միանալ իրենց և առաջիկա շաբաթվա ընթացքում հարյուրավոր մեքենաներով գնալ Սյունիք։