Ձեր վստահելի աղբյուրը

«Ասելիքներ շատ կան, և շատերն էլ ինքներդ գիտեք։ Ես 1990-ականներից մասնակցել եմ Ղարաբաղյան շարժմանը և մինչև այսօր էլ մասնակցում եմ»,- այսօր Ազատության հրապարակում «Հայրենիքի փրկության շարժման» հանրահավաքի ընթացքում ասաց սյունեցի ազատամարտիկներից մեկը։

Նա նշեց, որ ցանկանում է ամբիոնից մի փոքր հայտարարություն անել։

«Կիրակի օրը ժամը 1-ին Ղարաբաղյան պատերազմի մասնակից զինվորները հավաքվում են այստեղ (Ազատության հրապարակ, խմբ.)։ Մենք ցույց չենք անելու, խորհրդակցելու և կատարելու ենք մեր զինվորական որոշումը։ Այսօր երկրի տերը զինվորն է, ոչ թե այս թափառական, քյանդրբազի լարը կապած դավաճանները։ Իրենք իրենց շահի համար ազգին են ոտնահարում, դրան պետք է վերջ տալ։ Իսկ դրա վերջը բերելու է հայ զինվորը»,- ասաց նա, ապա հավելեց՝ ինքը 76 տարեկան է և մինչև մահ ու գերեզման կռվելու է թուրքի դեմ։

Սյունեցի ազատամարտիկը կոչ արեց, որ ոտքի կանգնեն տղամարդիկ, չթաքնվեն իրենց կանանց ներքնաշորերում։

«Մենք կիրակի օրը ազատամարտիկներով կհավաքվենք ու կպատրաստվենք ամսի 20-ի հանրահավաքին։ Առյուծնե՛ր, արթնացեք»,- կոչ արեց նա։

Նշենք, որ «Հայրենիքի փրկության շարժման» մեծ հանրահավաքը կանցկացվի փետրվարի 20-ին, ժամը 15.00-ին։