Ձեր վստահելի աղբյուրը

«Կարծում եմ՝ պետք է ամեն ինչ անել, որ համաժողովրդական շարժում լինի»,- Ազատության հրապարակում լրագրողների հետ ճեպազրույցում ասաց Հայրենիքի փրկության շարժման վարչապետի թեկնածու Վազգեն Մանուկյանը:

Ըստ նրա, մի քանի հարյուր հազար մարդ կա, որոնք սարսափելի էմոցիոնալ դժգոհության մեջ են, միլիոն մարդ էլ կա, որ դժգոհ է Փաշինյանից, բայց հավես չունի մասնակցել այս ամեն ինչին տարբեր պատճառներով ու կոտրված է: Վ.Մանուկյանի խոսքով, պետք է կարողանալ այդ մարդկանց փողոց հանել, որ լինի համաժողովրդական շարժում իր ամբողջ տպավորիչ ծավալով:

«Փաշինյանը կամավոր չի հրաժարվի մի քանի պատճառով: Ինքը նախ և առաջ վախենում է, թե իշխանությունը կորցնելուց հետո ինչ պատասխան է տալու: Երկրորդ՝ չտես մարդիկ եկել են իշխանության ու վայելում են, իրենք իշխանությունը հեշտ չեն տա: Այդ դեպքում պետք է կոտրել իր հենարանները: Իսկ ովքե՞ր են իր հենարանները: Իր հենարաններից է ԱԺ «Իմ քայլը» խմբակցությունը, այսինքն` պետք է աշխատել «Իմ քայլի» հետ, ոստիկանության բարձրաստիճան սպաներ էլ կան»,- նշեց նա:

Վ. Մանուկյանի խոսքով, սոցիոլոգիական հարցումները ցույց են տալիս, որ օրեցօր գիտակցող մարդկանց թիվն ավելանում է, մարդիկ սկսում են հասկանալ երկրում ստեղծված իրավիճակը:

Հայրենիքի փրկության շարժման վարչապետի թեկնածուն ասաց, որ հեղափոխությունները նախապատրաստվում են, իսկ ապստամբությունները դժգոհ ժողովուրդն է անում.

«Իմ կողմից միշտ էլ կխրախուսեմ ապստամբությունը: Ցանկացած միջոց, որը ֆիզիկական միջոցների չի դիմում մարդկանց նկատմամբ, բայց նպաստում է իշխանությունից ազատվելուն, ես կխրախուսեմ:

Պետության համար չկա ավելի վտանգավոր տարբերակ, քան Փաշինյանի վարչապետ լինելը: Մնացած բոլոր տարբերակները շատ ավելի մեղմ են, քան այն տարբերակը, որ Փաշինյանը մնում է այդտեղ:

Հազարավոր տարիների ընթացքում մենք այսպիսի վիճակ չենք ունեցել, երբ որ երկրի ղեկավարն այսպիսի ցինիկ ձևով ամբողջ երկիրը ոչնչացնում և ծախում է»: 

Վազգեն Մանուկյանի խոսքով, այս իշխանության ժամանակ ամեն օր կորուստ ենք ունենում, իսկ ամեն մի կորուստ վերականգնելը շատ ու շատ դժվար է դառնում:

Ինչ վերաբերում է Նիկոլ Փաշինյանի նախ հայտարարած հնարավոր արտահերթ ընտրությունների անցկացմանը, որը, սակայն, չեղարկվեց, Վ. Մանուկյանն ասաց. «Մենք ընտրությունների կողմնակից ենք եղել, մենք էինք հայտարարել, բայց Նիկոլ Փաշինյանի հեռացումից հետո:

Ինքն ուզեցավ նախաձեռնություն ցուցաբերել, հայտարարեց արտահերթ ընտրությունների մասին: Մենք դրան առանձնապես մեծ բանի տեղ չդրեցինք, որովհետև պարզ էլ չէր՝  դա խորամանկություն է, անելու է, չի անելու, ինքն էլ հետ նահանջեց իր ասածից: Դրանից մեր նախագծերը չփոխվեցին: Մեր նախագիծն է համաժողովրդական շարժումով իրեն փոխել»:

Վազգեն Մանուկյանի խոսքով, բոլոր դեպքերում ինքն ընտրություններին չի մասնակցելու. «Եթե Նիկոլ Փաշինյանը փոխվի, ժամանակավոր իշխանություն լինի, և նախատեսված էր, որ ես եմ լինելու վարչապետ, ես հայտարարել եմ, որ ես այդ ընտրություններին չեմ մասնակցելու: Իսկ եթե Նիկոլ Փաշինյանին հաջողվեր անցկացնել ընտրություններ, որն անհնարին եմ համարում, այդ դեպքում ևս հայտարարել եմ, որ չեմ մասնակցելու»:

Հարցին՝ եթե ընտրությունները լինեն 2023 թվականին, կմասնակցի՞, նա պատասխանեց. «2023 թիվը գիտե՞ք ինչքան հեռու է: Մինչև 2023 թիվը Աստված գիտի՝ Հայաստան կլինի, թե չի լինի»:

Վազգեն Մանուկյանը համոզված է, որ այսօրվա ԱԺ-ն պետք է փոխվի, բայց թույլ տալ, որ գործող իշխանությունը կազմակերպի ընտրություն, նշանակում է՝  նորից վերարտադրել այդ իշխանությունը:

«Այն իշխանությունը, որն այսքանից հետո ամեն ինչ, ամեն օրինական և ոչ օրինական ջանքեր թափում է իշխանության մնալու համար, ի՞նչ եք կարծում՝ ընտրության ժամանակ այդ նույն  ջանքերը չի՞ թափելու: Թափելու է:

Դրա համար մեզ պետք է մի իշխանություն, որը հրատապ հարցերը լուծի, որից հետո ստեղծի մթնոլորտ ազատ ու արդար ընտրություններ կազմակերպելու համար»,- ասաց Վ. Մանուկյանը:

Հիշեցնենք, որ Վազգեն Մանուկյանը երեկ բոլորին հրավիրել էր Ազատության հրապարակ՝ քննարկելու առաջիկա ծրագրերը:

«Այսօր հանրահավաք չէ, Հայրենիքի փրկության շարժմանը մեր հանրահավաքը փետրվարի 20-ին է, մեծ հանրահավաք է լինելու: Այսօր ուղղակի հրավիրել եմ ժողովրդին՝ միասին հարցեր քննարկելու: Սա իմ անձնական նախաձեռնությունն է։ Այս հավաք-քննարկումը որևէ կապ չունի Հայրենիքի փրկության շարժում նախաձեռնության հետ»,- ասաց նա:

Մանուկյանի խոսքով, փետրվարի 20-ի հանրահավաքից հետո շարժումն իր գործունեությունը շատ ավելի մեծ թափով կշարունակի: