Ձեր վստահելի աղբյուրը

«Սովորաբար այս կառավարություն ինչ հայտարարում, խոսում է, կյանքը ցույց տվեց, որ իրականության հետ կապ, առնչություն չունի։ Սուտասանների, չարիքի կառավարություն է»,- Ազատության հրապարակում լրագրողների հետ ճեպազրույցում ասաց ՀՅԴ ԳՄ անդամ, Հայրենիքի փրկության շարժման  համակարգող Իշխան Սաղաթելյանը։

Նա ընդգծեց՝ Շարժումը շարունակվում է, փետրվարի 20-ին կլինի գլխավոր հանրահավաք, դրանից հետո կշարունակվեն բողոքի անհնազանդության ակցիները Երևանում և Երևանից դուրս։

«Օր առաջ պետք է հեռացնենք այս իշխանությանը, որպեսզի փրկենք մեր երկիրը։ Քանի այս կառավարությունը կա, ամեն առավոտ մենք նոր իրողության առաջ ենք կանգնելու։ Դրա ապացույցը մենք տեսել ենք այս երեք ամսում, հիմա էլ ասում եմ՝ առաջիկայում այս կառավարությունը  նոր փաստաթղթեր է ստորագրելու թշնամի երկրի հետ։

Ես ենթադրում եմ, հիմա Դավիթ Բեկի հետ կապված լուրջ մտահոգություն ունենք ինչպես ժամանակին ասում էինք Շուռնուխի, Որոտանի մասին։ Իմ տրամադրության տակ փաստաթուղթ չկա, բայց կա տեղեկություն, որ հիմա նման հարցեր քննարկվում են։ Աստված տա  իրականություն չդառնա, մենք սխալ դուրս գանք»,- նշեց նա։

Ի.Սաղաթելյանի խոսքով, այս կառավարությունը վտանգավոր է մեր երկրի համար, իրենք պատրաստ են քայլ առ քայլ զիջել հայրենիքի տարբեր հատվածներ. «Դրա համար առաջին քայլը սրանց հեռացնելն է, համաժողովրդական զանգվածային ճնշման տակ պետք է քշենք սրանց։

2018 թվականին ժողովուրդը ձայն տվեց այս իշխանությանը ոչ թե գար, երկիրը կործաներ, կանգնեցներ այս անդունդի եզրին, տվել էր, որ լավ, բարեկեցիկ ապրեր, լավ տնտեսություն ունենար, պաշտպանված լիներ։ 

Հիմա ժողովուրդը դուրս կգա, չեմ կարծում, որ կարող է հանդուրժել այս վիճակը։ Ժամանակն է շոկային իրավիճակից դուրս գալ, իջնենք փողոց ու համատեղ միջոցներով հասնենք մեր նպատակին»,- ասաց ՀՅԴ ԳՄ անդամը։

Նա նշեց, որ այս կառավարությունը վաղուց որևէ առնչություն չունի Հայաստանի, հայ ժողորդի հետ, ըստ էության, սպասարկում է  այլ երկրի շահեր,  հակառակ դեպքում այն քայլերը, գործողությունները, որոնք արվում են, չպետք է լինեին։

«Հետևաբար, ևս մեկ անգամ կոչ եմ անում հանրությանը, հասարակությանը՝  դուրս եկեք փողոց, միասին, համատեղ ուժերով հեռացնենք այս չարիք կառավարությանը, ձևավորենք նոր կառավարություն, ով ստեղծված իրավիճակում կկարողանա դիմագրավել մեր երկրի առջև կանգնած մարտահրավերներին և դուրս գանք այս վիճակից»,- ասաց Իշխան Սաղաթելյանը։

Հայրենիքի փրկության շարժման համակարգողն ընդգծեց՝ ունեն պլան Ա, Բ, Գ, հիմա առաջնորդվում են պլան Ա-ով՝  զանգվածային ճնշման տակ հեռացնել այս իշխանություններին։