Ձեր վստահելի աղբյուրը

«Այն, ինչ տեղի ունեցավ 2018-ի գարնանը, իր էությամբ հակաղարաբաղյան շարժում էր։ Եվ անկեղծորեն պետք է ասեմ, ոչ միայն հակաղարաբաղյան, այլև ղարաբաղցիների դեմ»,-Արմնյուզ» հեռուստաընկերությանը տված բացառիկ հարցազրույցում հայտարարեց ՀՀ երրորդ նախագահ Սերժ Սարգսյանը՝ պատասխանելով հարցին, թե ինչպե՞ս փոխանցեց իշխանությունը մարդկանց, ովքեր բանակցություններից պատկերացում չունեին։

Սերժ Սարգսյանի խոսքով, ստեղծվել էր մի իրավիճակ, երբ նա նախընտրեց անցնցում հեռանալ, քան առաջարկել հանրությանը բազմաթիվ լուծումներից մեկը։

«Ես երբեք չեմ համաձայնվում այն մտքի հետ, որ ես նրանց հանձնել եմ իշխանություն։ Ո՛չ։ Նախ իշխանությունը ես հանձնել եմ Կարեն Կարապետյանին։ Հասկանում եմ, որ մարդիկ իրավունք ունեն կարծելու, որ ես իշխանությունը հանձնել եմ սրանց։ Տեսեք՝ ինչպիսի իրավիճակ էր ստեղծվել։ Ես, ելնելով աշխարհաքաղաքական իրողություններից ու այն համոզմունքից, որ եթե փոխվի գլխավոր բանակցողը, ապա բանակցային գործընթացում տեղի են ունենալու այնպիսի փոփոխություններ, որոնք ճակատագրական են լինելու մեր երկրի համար, համաձայնվեցի ընտրվել վարչապետ, և որևէ մեկը չէր կարող կանխատեսել, որ Հայաստանում կարող է այդ շարժումը, նախաձեռնությունը ստանալ այսպիսի ընթացք»,-ասավ Սերժ Սարգսյանը։

Անդրադառնալով հարցերին, թե ինչու նախնական փուլում, կամ Ռադիոտունը գրավելուց հետո միջոցներ չձեռնարկվեցին, երրորդ նախագահն ասաց՝ շատ լավ հասկանում է  նման հարցեր տվող մարդկանց, բայց ուզում է, որ նրանք էլ իրեն հասկանան՝ չկար որևէ նախադրյալ, որ շարժումը նման թափ կարող էր ստանալ։

Անդրադառնալով այն հարցին, արդյո՞ք Նիկոլ Փաշինյանն իր պրոեկտն է, Սերժ Սարգսյանն արձագանքեց.

«Նախ ասեմ, որ ապագա կապիտուլյանտն իմ տեսադաշտում հայտնվել է 93 թվականի վերջերին, երբ ես մի քանի ամսվա պաշտպանության նախարար էի, երբ ռազմաճակատում բազմաթիվ հաջողություններից հետո մենք դժվարություններ ունեցանք։ Այդ խնդիրները մանիպուլացնելով, իրականությանը չհամապատասխանող փաստեր բերելով, անհարկի քննադատելով ուղղակի ցավ էր պատճառում մեզ, ոչ միայն ինձ, այլև իմ մարտական ընկերներին։ Երկրորդ անգամ մենք հանդիպել ենք 90-ականների վերջին դատարանում, երրորդ անգամ՝ 2018 թվականին «Մարիոթ» հյուրանոցում»։

ՀՀ երրորդ նախագահի խոսքով, որևէ այլ հանդիպում, միջնորդավորված կապ իր ու Նիկոլ Փաշինյանի միջև չի եղել։

«Ինչ վերաբերում է, որ կապիտուլյանտն իմ նախագիծն է, դա ուղղակի զավեշտ է։ Ես այդպիսի նախագիծ չէի ցանկանա նույնիսկ իմ թշնամուն, ուր մնաց թե ինձ համար նման անհեթեթություն խզբզեի։ Կապիտուլյանտն իմ նախագիծը չէ։ Կապիտուլյանտին ընտրել է մեր խաբված ժողովուրդը այլ ուժերի ուղղորդմամբ»,-ասաց նա՝ ընդգծելով, որ Փաշինյանն այն ուժերի նախագիծն է, ում հետ ինքը ընդհանուր որևէ բան ունենալ չէր կարող, ունեցել է միայն հակասություններ։