Ձեր վստահելի աղբյուրը

Կորոնավիրուսի բրիտանական շտամը, որը արագորեն տարածվում է Սլովակիայում, առանձնահատուկ վտանգ է ներկայացնում 21 տարեկանից ցածր երեխաների, դեռահասների և երիտասարդների համար։

Երկրի կլինիկաներում աճում է այն հիվանդների թիվը, որոնց մոտ դրսևորվող ասիմպտոմ դեպքերը վերածվում են դեռևս անհայտ հիվանդության՝ հանգեցնելով մարմնի ցանավորման, բերանի խոռոչի լորձաթաղանթի բորբոքումների, ոտքերի և ձեռքերի ուռելու: Այս մասին գրում է «ՏԱՍՍ»-ը՝ վկայակոչելով Սլովակիայի գլխավոր մանկաբույժ Ելենա Պրոկոպովայի խոսքը։

«Կորոնավիրուսի շտամը, որը Չինաստանից եկել էր համաճարակի առաջին ալիքի ժամանակ, երեխաների և դեռահասների համար այնքան վտանգավոր չէր, որքան այժմ տարածված բրիտանական շտամը»,- ասել է  նա։

Նա նշել է, որ որպես կանոն, «բրիտնական շտամով» վարակված հիվանդները ընդունվում են կլինիկաներ ծայրահեղ ծանր վիճակում: Շատ դեպքերում, ինչպես ցույց է տալիս սլովակ մանկաբույժների պրակտիկան, այդ հիվանդների տարիքը տատանվում է հինգից վեց տարեկանի սահմանում: 20 տարեկանները նույնպես հոսպիտալացվում են հիվանդության հստակ նշաններով:

Պրոկոպովան ավելի մանրամասն տեղեկատվություն չի տրամադրել: Հանրապետության առողջապահության նախարարությունը, նրա խոսքով, մշակում է կլինիկաներից ստացված տվյալները՝ նոր հիվանդության ախտանիշներով հոսպիտալացվածների մասին: