Ձեր վստահելի աղբյուրը

Պետական վերահսկողության ծառայության ուսումնասիրությունների հիման վրա,  «Կոնդի առանձնատների տնտեսություն» ՊՈԱԿ-ում առերևույթ կատարված չարաշահումների դեպքի առթիվ Քննչական կոմիտեում հարուցված քրեական գործով նշանակվել է շինարարատեխնիկական, դատահաշվապահական, տնտեսագիտական համալիր փորձաքննություն, որի եզրակացությունը ստացվել է: Այս մասին Panorama.am-ին հայտնեցին քննչական կոմիտեից։

Ըստ աղբյուրի, ներկայումս կատարվում են քննչական և դատավարական գործողություններ՝ փորձաքննությամբ արձանագրված հանգամանքներին իրավական գնահատական տալու ուղղությամբ: 

«Նախաքննությունը շարունակվում է»,-հայտնեցին ՔԿ-ից։

Հիշեցնենք, որ վարչապետի աշխատակազմի անմիջական հսկողության ներքո գործող «Կոնդի առանձնատների տնտեսություն» ՊՈԱԿ-ի կողմից կատարված վերանորոգման աշխատանքներում պետական վերահսկողական ծառայությունը չարաշահումներ է հայտնաբերել։
Այս ՊՈԱԿ-ի հաշվեկշռում են գտնվում կառավարական առանձնատները, որտեղ բնակվում են բարձրաստիճան պաշտոնատար անձինք։

«Փաստինֆո»-ն    ավելի վաղ գրել էր, որ դեռևս 2019 թվականին մեծ աղմուկ հանեց տեղեկատվությունն առ այն, որ պետական բյուջեից շուրջ 2 միլիոն դոլար է հատկացվել ՀՀ վարչապետ Նիկոլ Փաշինյանին և նրա ընտանիքին սպասարկող կառավարական առանձնատան մասնաշենքը հիմնանորոգելու, վերանորոգելու և կահավորելու համար։ Ընդ որում՝ վարչապետի աշխատակազմին գումարը հատկացվել էր կառավարության գաղտնի որոշմամբ, իսկ վերանորոգման շրջանակներում, ըստ տեղեկությունների, միլիոններ են ծախսվել։

Կատարված վերանորոգումը խնդրահարույց էր համարել անգամ պետական վերահսկողության ծառայությունը։

«Փաստինֆո»-ի գրավոր հարցմանն ի պատասխան ՊՎԾ-ն պաշտոնապես հաստատել էր, որ 2019 թվականի աշխատանքներում արձանագրվել են չարաշահումներ։

«ՀՀ պետական վերահսկողության ծառայությունը իրականացրել է մշտադիտարկում «Կոնդի առանձնատների տնտեսություն» ՊՈԱԿ-ում։ Մշտադիտարկվել են 2019թ ՊՈԱԿ-ում կատարված աշխատանքները, այդ թվում նաև՝ կառավարական առանձնատների վերանորոգման աշխատանքները։ Հայտնաբերված խախտումների մասին տեղեկանքը ուղարկվել է իրավապահ մարմիններին»,- օգոստոսի 26-ին գրավոր տեղեկացրել էր ՊՎԾ-ն։

Հիշեցնենք, որ «Ճշմարտություն սերունդների համար» նախաձեռնության անդամ Գեղամ Նազարյանը, ում որդին զոհվել է պատերազմի ընթացքում, կոչ է արել պետական ամառանոցները տրամադրել պետության պաշտպաններին։ Կոչին միացել են բազմաթիվ մարդիկ, այդ թվում լրագրողներ, փաստաբաններ, զոհված զինծառայողների հարազատներ։

««Կոնդի առանձնատների տնտեսություն» ՊՈԱԿ-ը իր մեջ ներառում է 9 շքեղ առանձնատուն և դրանց համար նախատեսված շինություններ: Զբաղեցնում է բավական մեծ տարածք, գտնվելով քաղաքի ամենագեղատեսիլ հատվածում: Այս տարածքը լավագույնն է յուրօրինակ բժշկական ավան դառնալու մեր զինվորականների, նրանց ընտանիքի անդամների համար:

Այս հսկայական տարածքում ապրում է ընդամենը  2  ընտանիք։ Մեր տղերքը մեզ բոլորիս պաշտպանում էին թշնամուց, իսկ այդ երկու ընտանիքը ումի՞ց  է պաշտպանվում»,-նշել էր Գեղամ Նազարյանն իր նախաձեռնության վերաբերյալ հայտարարության մեջ։