Ձեր վստահելի աղբյուրը

«Հրապարակ» թերթը գրում է.

«Մի քանի օր է՝ հակասական տեղեկություններ են տարածվում Արցախի Մարտունի քաղաքում Գարեգին Նժդեհի արձանի ապամոնտաժման մասին։ Նախ «Նժդեհի արձանը Մարտունիում ապամոնտաժվեց՝ Ադրբեջանի պահանջով» գրությամբ լուսանկարներ տարածվեցին, ապա գրվեց, որ ռուսներն են դրդել հանել արձանը, քաղաքապետ Էդիկ Ավանեսյանը հերքեց դա։ Ավագանու անդամներից մեկն էլ կանգուն արձանի տեսանյութը տարածեց։ Ինչի՞ց է ծագել աղմուկը։

Մեր աղբյուրն ասաց, որ արձանի պատվանդանը կառուցվել է անցած տարի, սեպտեմբերին պետք է տեղադրվեր կիսանդրին, բայց պատերազմը խանգարել է, և այն տեղադրվել է 2021-ի հունվարի 25-ին, սակայն պաշտոնական բացման արարողություն չի եղել։ «Կիսատ աշխատանքներ կան, պետք է ավարտենք, նոր բացումն անենք։ Փողոցը, որտեղ տեղադրվել է, պետք է ասֆալտապատեինք, բայց պատերազմը սկսվեց՝ չարեցինք, եկող տարի է նախատեսվում։ Արձանի երկու կողմը քանդված է, քանդակագործը պիտի գա՝ տեղում շտկի։ Ես չգիտեմ՝ ով էր ինքնագլուխ գնացել, արձանը բացել, ու նման խոսակցություններ տարածվեցին»,- ասաց քաղաքապետը։

Մեզ հայտնեցին, որ ի սկզբանե քաղաքապետին ասվել է, որ կիսանդրին պետք է հանեն-տանեն՝ կիսատ գործն ավարտեն։ «Թե ով էր ասել, ինչու, չգիտեմ»,- ասացին։ Քաղաքապետը, սակայն, վստահեցրեց, որ արձանն իր տեղից չի շարժվելու. «Այս պահին չկա նման խոսակցություն»։ Կիսանդրու հեղինակը քանդակագործ Արմեն Պետրոսյանն է»։

Մանրամասները թերթի այսօրվա համարում