Ձեր վստահելի աղբյուրը

«Մենք երեկ ևս մեկ անգամ համոզվեցինք, որ դատարաններն ունեն կոշտ դիրքորոշում, մերժում են քաղաքական ցանկացած պատվեր, որ իրականացվում է  մեր դեմ»,- «Հայելի» ակումբում հայտարարեց ԱԺ նախկին պատգամավոր, Արցախի պատերազմի մասնակից Արագած Ախոյանը՝ անդրադառնալով Վերաքննիչ դատարանի կողմից իրեն ու բռցքամարտի աշխարհի չեմպիոն Իսրայել Հակոբկոխյանին կալանավորելու միջնորդությունը մերժելուն։

Ախոյանի խոսքով, իր դեմ հարուցված քրեական գործում որևէ նյութ չկա, և դատարանների նման որոշումն իրականում խոսում է դատավորների բարձր պրոֆեսիոնալիզմի մասին։

Նա հիշեցրեց օրեր առաջ իր, սահմանադրագետ Վարդան Այվազյանի, Դեմկուսի նախագահ Արամ Սարգսյանի, Արշակ Զաքարյանի, Տիգրան Չոբանյանի ու այլոց ստորագրություններով  նամակով դիմել են գլխավոր դատախազություն Նիկոլ Փաշինյանի կողմից առերևույթ հանցագործությունների կատարման վերաբերյալ։

Գլխավոր դատախազությունն այն մակագրել է ՀՔԾ տեղակալ Ենոքյանին, պատճենն ուղարկել է դիմողներին։

«Մենք իհարկե գիտենք, պատասխանը, ասելու են՝ քննություն է իրականացվելու, եթե այս իշխանությունը մնաց, կարճելու ենք գնան»,-ասաց Ախոյանը՝ համոզմունք հայտնելով, որ քաղաքական պատվեր իրականացնող իրավապահ մարմինների ներկայացուցիչները հայտնվելու են դատարանում։

Ի դեպ, Ախոյանը խոստացավ ազգագրական խմբեր է բերելու, դհոլ-զուռնայով տոնելու է Փաշինյանի դատավարության մեկնարկի օրը։
«Սա ես ասում եմ հայ ժողովրդի ու Հայաստանի դեմ հանցագործությունների համար։ Ինքը պետք է պատասխան տա իր ոհմակով»,-ասաց քաղաքական գործիչը։

Բանախոսը նշեց՝ ինքը վաղը լինելու է Ազատության հրապարակում։ Նա պնդում է՝ Նիկոլ Փաշինյանը հասարակության աջակցություն չունի, Գյումրիում տեղի ունեցածն էժանագին շոու է։
«Ես ինֆորմացիա ունեմ, որ մի քանի հոգու հետ փակ դահլիճում հանդիպելուց հետո նա ուղղակի գաղտագողի փախել է այնտեղից, որպեսզի գյումրեցիների հետ չշփվի, որովհետև կարող է  դրա տակից դուրս չգա։ Հիմա էժանագին շոուներով փորձումէ  ցույց տալ, իրեն աջակցում են։ Ճանաչում եմ իրեն այսպես ասած աջակցողներին, կարող եմ ասել, իրենց խաբված չզգալու համար, ինչ-ինչ հարցերից ելնելով են նման քայլերի գնում։ Ես դա տղամարդկություն չեմ համարում, բոլորն էլ սխալվելու իրավունք ունեն, ոչինչ դուք եկեք, որպեսզի մեղքերի քավեք, ոչ մեկ չի ասի՝ բա դուք Նիկոլ էիք պաշտպանում, ինչի՞ եք եկել»,-ասաց Ա. Ախոյանը՝ ընդգծելով, որ միասնականությամբ պետք է լուծել երկրի առաջ կանգնած լուրջ մարտահրավերները։

Ախոյանը նշեց, դավաճանության մասին խոսում են շատերը, կան ապացույցներ, փաստեր։

«Արշակ Զաքարյանը հրապարակել է տեսանյութ, տեսել ենք, թե ինչ անգործության հետևանքով է հանձնվել Շուշին։ Երբ հատուկ ջոկատայինները հայտնում են, որ 1500 հոգի քայլելով գալիս են, առանց վախի, առանց թաքնվելու, կորդինատները տալուց հետո, ոչ մի ռմբակոծություն, հրետանու կողմից ոչ մի հարված չի հասցվում։ Եթե մի քանի հուժկու հարված լիներ այդ կորդինատներով, մենք Շուշին չէինք կորցնի։ Սա իմ կարծիքն է, բայց ես խնդրում եմ իրավապահներին քննության առարկա դարձնել։ Ազգի դավաճանություն է տեղի ունեցել, նայեք այդ փաստերը»,-ասաց Ախոյանը։

Ի դեպ, նա դավաճանության հետևանք է համարում թշնամու կողմից Ռուստամ Գասպարյանին ու նրա որդուն, իր մարտական ընկերոջ Արթուրին սպանելը։
«Անհնար էր, թշնամին չէր կարող այդ տարածքը դիտարկել, իմ կարծիքով, դա էլ դավաճանության հետևանք էր, ինչ-որ մեկը կարծում եմ կորդինատները տվել էր։ Մեր իրավապահները դեռ շատ ինչուների պատախան պետք է տան»,-ասաց նա։