Ձեր վստահելի աղբյուրը

Հայրենիքի փրկության շարժման փետրվարի 20-ի կազմակերպելիք հանրահավաքից «Ազգային օրակարգ» կուսակցության համահիմնադիր Արա Հակոբյանի ակնկալիքները մեծ են:

«Կարծում ենք՝ մասնակցությունը մեծ կլինի, քանի որ ժողովուրդը ժամանակ ունեցավ որոշակիորեն հասկանալ, թե ինչ իրավիճակում ենք գտնում, սգի և վշտի մտքերով ապրելով հանդերձ հասկանալ, որ պետք է դրա դեմն առնել, որպեսզի շարունակություն չունենան:

Ժամանակ ունեցավ հասկանալ, որ զիջումներն ու կորուստները, որ մենք ունեցանք, միայն Արցախին չէին վերաբերում, նաև ուղիղ Հայաստանին: Մարդկային և տարածքային կորուստները շարունակվում են: Ժամանակ ունեցավ հասկանալու, որ  ինքնիշխանությունը, որ կորցրինք Արցախի նկատմամբ, այդ ինքնիշխանությունը վտանգված է և կորուստն առարկայական է դառնում նաև Հայաստանի համատեքստում:

Այս ամբողջը, մենք կարծում ենք, կբերի նրան, որ վաղը կլինի ընդվզում»,- ասուլիսում ասաց Արա Հակոբյանը:

Նա նշեց, որ ռազմաքաղաքական վերնախավի, նրանց հակապետական և ապազգային նպատակների վերաբերյալ ամեն ինչ ասված է, հիմա առաջնային խնդիր է՝ ինչ պետք է անել:

«Մեր հայրենակիցների մասնակցությունն անհրաժեշտ է, որովհետև ցանկացած ընդդիմադիր ձևաչափ չի կարող լինել արդյունավետ, հասնել արդյունքի, եթե հայությունը չի մասնակցում այդ պայքարին»,- ասաց քաղաքական գործիչը:

Նա ընդգծեց՝ այդ պայքարն ընդդիմության համար չէ, ի վերջ իշխանության համար էլ չէ, այդ պայքարն ամեն մեկիս ապագայի, Հայաստանի ապագայի, Հայաստանի ինքնիշխանության համար է:

«Մենք պետք է դա այդպես ընկալենք, խիստ անձնական դիտարկենք ու մասնակցենք»,- ասաց Արա Հակոբյանը:

Նա նշեց, որ այսօր հայ ժողովուրդն ապրում է ոստիկանապետության ներքո, բոլոր իրավապահ մարմինների հնարավորությունները օգտագործվում են, որպեսզի  հանրության պայքարող տարրը  ճնշվի, որոշ պարագաներում նաև կալանավորվի, այսինքն՝ փորձում են ձերբազատվել այդ ակտիվից:

«Պետք է շարունակել պայքարը՝ համակերպվելով նրան, որ մեր դեմ կոշտ քայլեր են լինելու: Տվյալ դեպքում անհանդուրժողականությունն է այն գործիքը, որով պետք է կարողանալ Փաշինյանին ու իր իշխանախմբին զրկել կառավարման լծակերից: Անհանդուրժողականություն ինչպես ներքին, այնպես էլ արտաքին թշնամու դեմ: Սա է այն ձևաչափը, որ կենաց և մահու կռիվը կհաղթենք:

Ցանակացած ապազգայնության և հակապետականության նկատմամբ պետք է անհնադուրժողականություն: Սեթևեթել չի կարելի: Չի կարելի ազատության, մարդու  իրավունքների անվան տակ հանդուրժել ամենաթողությունը, օտարի գործակալներին, այլասերվածությունն ու սրբապղծությունը: Մենք տեսանք դրա հետևանքները և դրա հետևանքն է, որ մենք ունենք Հայաստանում այս իրավիճակը»,- ասաց «Ազգային օրակարգ» կուսակցության խորհրդի նախագահ Արա Հակոբյանը:

Նա նշեց, որ այս իշխանությունը, ռազմաքաղաքական վերնախավն է առաջին պատասխանատուն ու մեղավորն այս ամենի համար, եթե ոչ միակ պատասխանատուն ու մեղավորը: Նրա խոսքով, քանի դեռ այս իշխանությունն է, անհետ կորածներին գտնելու և գերեվարվածներին վերադարձնելու հարցում արդյունավետ քայլեր հնարավոր չեն, քանի որ այս իշխանությունը պատասխանատվությունից խուսափում է, ասում է՝ դրանով զբաղում է Ռուսաստանը, անձամբ Պուտինը, Մուրադովը:

Ա. Հակոբյանը նշեց նաև, քանի այս իշխանություն է, գերեվարումները շարունակվելու են:

«Այս քաղաքական իշխանության օրոք այդ հարցն արդյունավետ չի լուծվելու: Քաղաքական խնդիր կա: Սրանք չեն կարողանում թշնամու հետ նստել, խոսել, սրանք չունեն այդ ոգին, որ նստեն թշնամու հետ ու հարց լուծեն:

Ցանկացած բան, որ իրենց իշխանության երկարաձգմանը չի վերաբերում, փորձում են այդ հարցերով չզբաղվել»,- նշեց նա:

Քաղաքական գործիչն ասաց, որ պետք է պատրաստվել երկարաժամկետ պայքարի, որն ավարտվելու է հաղթանակով:

Արա Հակոբյանը կոչ արեց, առաջարկեց, հորդորեց, խնդրեց  հայությունը, բոլոր նրանց, ովքեր մտահոգ են մեր հայրենիքի ապագայով, ովքեր մտահոգ են մեր ավանդույթների, սովորությունների հետ կապված, մեր դավանանքի, հայկականության, մեր մշակույթի ու լեզվի հետ կապված՝ փետրվարի 20-ին, ժամը 15:00-ին, լինել Ազատության հրապարակում:

«Մենք բոլորով պետք է պայքարենք այս արժեքների համար: Եթե հանրահավաքի կազմակերպիչների շարքերում կան մարդիկ, ուժեր, որոնք ձեզ դուր չեն գալիս, որոնց պատասխանատու եք տեսնում այս ամեն ինչի համար, ոչինչ, եկեք հանրահավաք, լուծենք առաջնային խնդիրը՝ եղած իշխանախմբի ու Փաշինյանի հեռացումը, մյուս փուլում ձեր նախասիրություններով, մոտեցումներով գնացեք նրանց հետևից, ում հավանում եք, վստահում եք: 

Հիմա միասին փորձենք ազատվել այս արհավիրքից ու չարիքից»,- ժողովրդին իր խոսքն ուղղեց Արա Հակոբյանը: