Ձեր վստահելի աղբյուրը

«Եթե գլխավոր շտաբը գործեր Սահմանդրությամբ իրեն տրված լիազորություններով, ապա մենք հոկտեմբերի առաջին տասն օրվա ընթացքում այլևս չէինք ունենա Նիկոլ Փաշինյան անունով վարչապետ, այլ զինվորական ղեկավար։ Դա իրենց պարտքն էր, իրենք պարտավոր էին դա անել»,- «Հայելի» ակումբում հայտարարեց Հայրենիքի փրկության շարժման մեջ ընդգրկված «Մեկ Հայաստան» կուսակցության նախագահ Արթուր Ղազինյանը։

Նրա խոսքով, ԶՈւ ԳՇ պետն այժմ անձամբ է պատասխանատվություն կրում առնվազն հոկտեմբերի 19-ից հետո բոլոր մարդկային ու տարածքային կորուստների համար։

«Սա անընդհատ պետք է հրապարակային հնչեցվի, քանի որ նրանց վրա էր դրված զինվորների կյանքի, առողջության ապահովումը, իրենք էին պարտավոր ապահովել Հայաստանի տարածքային ամբողջականությունը»,- ասաց քաղաքական գործիչը։

Ղազինյանի խոսքով, դավաճանության ևս մեկ ապացույց է այն, որ չնայած հոկտեմբերի 3-ին ԳՇ պետի զգուշացմանը, քաղաքական իշխանությունը որոշել է շարունակել պատերազմը, «մինչև Ադրբեջանի դրոշի օրը այն ծածանվի Շուշիում»։

«Բոլորն են խոսում, որ տեղի է ունեցել դավաճանություն, մի մասն ասում է ուղղակիորեն, ակադեմիկոս, նախկին դատախազ, քննիչ, դոցենտ, դոկտոր իրավաբաններն պնդում են, որ տեղի է ունեցել դավաճանություն, պետք է դավաճանն անհապաղ ձերբակալվի, որպեսզի նոր դավաճանություններ չլինեն, քաղաքական գործիչներն ասում են՝ եղել է դավաճանություն, երկրորդ և երրորդ նախագահներն այդ մասին ասում են անուղղակիորեն, նրանց արտահայտած ցանկացած միտք, պարունակում է հաղորդում հանցագործության մասին։ Նորից եմ կրկնում՝ դատախազությունը դարձել  է քաղաքական մարմին»,- ասաց նա։

Ի դեպ, անդրադառնալով նաև մարզերում քաղաքական հայացքների, հանրահավաքներին մասնակցելու համար ակտիվիստների, քաղաքացիների նկատմամբ իրականացվող հետապնդումներին, Ղազինյանը նրանց հորդորեց անհապաղ դիմել Հայրենիքի փրկության շարժման իրավական հանձնախմբին։