Ձեր վստահելի աղբյուրը

«Սիրելի՛ ժողովուրդ, այսօր իրոք շատ ծանր վիճակում ենք. տնտեսական ճգնաժամ, համավարակ, Արցախի պատերազմ, խայտառակ պարտություն, հողերի հանձնում, զոհեր ու վիրավորներ, անհետ կորածներ ու գերիներ»,- այսօր Նիկոլ Փաշինյանի հրաժարականի պահանջով մեծ հանրահավաքի ընթացքում ասաց «Բարգավաճ Հայաստան» կուսակցության  նախագահ Գագիկ Ծառուկյանը։

Նրա խոսքով, գժվելու բան է, որ պատերազմի ավարտից չորս ամիս անց էլ ծնողները լուր չունեն իրենց անհետ կորած կամ գերեվարված երեխաներից։

«Գոնե այդ մարդկանց ընդունեն, պատասխանեն հարցերին, ոչ թե անուշադրության մատնեն։ Դուք բոլորդ կհիշեք, որ 2020 թվականի հունիսի 5-ին ասացի՝ մենք անդունդի եզրին ենք, ասացի, որ այս անփորձ երիտասարդներն ի վիճակի չեն որևէ բան անելու։ Ես ասել էի, որ եթե այս իշխանությունները հրաժարական չտան, մենք կորցնելու ենք Արցախը։ Նաև ասել էի, որ ունենք երեք-չորս ամիս ժամանակ։ Եվ սեպտեմբերին պատերազմը սկսվեց։ Եթե խելք ունենային, լսեին, քայլ անեին, բանակցեին, պատերազմ չէր լինի, այդքան զոհ չէր լինի»,- նշեց նա։

ԲՀԿ ղեկավարի կարծիքով, այսօր դանակը հասել է ոսկորին, մարդիկ փողոց են դուրս գալիս, քանի որ ապրելու խնդիր ունեն։

«Այստեղ հավաքվածներից մարդ կա՞, որ վարկ չունի։ Բա, ժողովուրդ ջան, աշխատանք չկա, գործ չկա, փող չկա, մարդիկ չեն կարողանում երեխաներին կերակրել, ո՞նց ապրեն։ Մինչև այստեղ գալս 10-20 հոգի մոտեցել են ինձ, ասել, որ երեխաներ ունեն ու չեն կարողանում ապրել։ Առևտուր չկա, թոշակը ցածր, ամեն ինչ թանկացել է 30-50 տոկոսով։ Մարդիկ ո՞նց ապրեն։ Այսօր պետք է քայլեր արվեն, որ մարդիկ կարողանան գոնե գոյատևել»,- նկատեց նա։

Գագիկ Ծառուկյանը նշեց, որ մարդկանց ունեցվածքը տանում են, երբ սպառողական վարկերը չեն կարողանում փակել։ Այդ դեպքու ԲՀԿ առաջնորդի խոսքոսվ, պետք է պետությունը վարկերի ներում շնորհի։

«Որոշ վարկեր պետք է սառեցվեն, քանի որ տնտեսական ճգնաժամ է, համաճարակ է։ Պետություն պահողը ժողովուրդն է, նրան պետք է ճահճում ձեռք մեկնեն։ Բոլորը աշխատանքի, փողի, երեխային կերակրելու խնդիր ունեն...։ Պետք է մարդկանց թոշակներն ավելացնեն, տոկոսները սառեցնեն, որոշ դեպքերում ներում շնորհել։ Ես նորից եմ ասում՝ օր օրի ամեն ինչ ավելի է վատանալու։ Այս իշխանությունները չեն կարող, փորձ չունեն, խնդիր լուծելու ի վիճակի չեն։ Նրանք պետք է վայրկյան շուտ հրաժարական տան, որ ազգի փրկություն լինի»,- շեշտեց նա։

Գագիկ Ծառուկյանն ասաց, որ փրկությունը միայն իշխանությունների հրաժարականն է։

«Ժողովուրդը կարիք ունի ուշադրության, վերաբերմունքի։ Մարդիկ պիտի հեռվում լույս տեսնեն»,- նկատեց ԲՀԿ ղեկավարը։