Ձեր վստահելի աղբյուրը

«Կրկնազարթոնքը լինելու է Հայաստանում, նորից ոտքի ենք կանգնելու և Հայաստանն ու Արցախը տանելու ենք առաջ»,- Ազատության հրապարակում Հայրենիքի փրկության շարժման հանրահավաքի ժամանակ ասաց պաշտպանության նախկին նախարար Սեյրան Օհանյանը:

Նա նշեց, որ այսօրվա ապիկար, ապազգային իշխանությունն իրենց գրագետ, կառուցողական ընկերների հետ պայմանավորված, մեր երկիրը տարան դեպի անկում:

«Այն արժեքները, որ ձեռք էինք բերել այս 30 տարիներին, բավարար էին, որ մեր պատմությունը կերտենք ու գնանք առաջ, ստեղծենք մեր պետությունը, հայկական բանակը։

Մեր բանակն օրեցօր կատարելագործվել է և ճիշտ չէ այս պարտությունը գցել բանակի վրա: Ամենակարևորը՝  բարոյական չէ դա, որովհետև  այս պատերազմի ժամանակ բանակը մեն-մենակ հայտնվեց հակառակորդի հետ միասին: Բանակը մնաց առանց թիկունքի: Համոզված ենք, որ շարքայինները, հրամանատարները  մարտի դաշտում քաջաբար կռվել են, իրենց կյանքն են տվել հայ ժողովրդի արժանապատվության համար: 

Միայն բանակի թիկունքը շատ փխրուն է եղել մինչև պատերազմը և ողջ պատերազմի ընթացքում, որովհետև այս իշխանությունները բանակի նկատմամբ իրենց ռազմավարությունը կառուցել են ոչ թե ռազմավարական բարձր նշակետից, այլ իջեցրել են մարտավարական նույնիսկ ամենացածր վարտիքի մակարդակի»,-ասաց Ս. Օհանյանը:

Նա նշեց, որ իշխանությունները հնի ու նորի բաժնելով, պառակտելով հասարակությունը, բանակն էլ են բաժանել հնի ու նորի։

«Տեղեկացնեմ, որ ԳՇ պետ Մովսես Հակոբյանին փոխելու ժամանակ, երբ նա հրաժարվում էր, անօրինական քայլ է կատարվել ԶՈՒ ԳՇ-ի և ԳՇ պետի նկատմամբ, որովհետև համապատասխան պայմանագրով համապատասխան տարիների ծառայություն նա պետք է իրականացներ։ Հակառակ դեպքում ինչպե՞ս հասկանալ, երբ այս իշխանությունների ղեկավարը հրավիրում և ԳՇ պետին ասում է՝ ես ուզում եմ ազատվել բոլոր հներից:

Ի՞նչ է նշանակում հին բանակում: Դա նշանակում է  տարիքով  անձնավորություն համապատասխան գիտելիքներով, հմտություններով և ունակություններով։ Դա նշանակում է բարձր պաշտոնատար անձ, ով անցել է ծառայողական աստիճանով և ավելի լավ է տիրապետում այսօրվա ռազմական թատերաբեմը, ավելի լայն աշխարհայացք ունի:

Հին նշանակում է բարձր կոչում, որի համար արյուն-քրտինք թափելով, 4 անգամ վիրավորվելով դու նրան ասում ես՝ ազատվիր, որովհետև հին ես:

Հին նշանակում է փորձված, մարտական կարողությունների տեր, Աֆղանստանով,  Արցախյան առաջին պատերազմով, Ապրիլյան պատերազմով անցած անձնավորությանը ազատել պաշտոնից:

Արդյունքը մենք տեսնում ենք՝ կառավարման մեջ թերություններ, թիկունքը բաց, ժողովրդին չենք կարողանում համախմբել:

Ինչպե՞ս կարելի է վարչական ռեսուրսը  օգտագործելով մարդկանց տանել Եռաբլուր, գրկել զոհված ծնողի հարազատին, բայց այդ նույն բանը չանել պատերազմի տարիներին, չգնալ, չգրկել հայոց հրամանատարին, հայոց զինվորին, որ հետո զոհված զինվորի հարազատին չգրկես:

Այս ամենը ապիկարության արդյունք է։

Այսօր հայոց բանակը պետք է մնա հայ ժողովրդի միակ երաշխավորը անվտանգության»,-ասաց պաշտպանության նախկին նախարարը։ 

Նա ընդգծեց՝ հայոց բանակը պետք է մերժի այն անձերին, որոնք չեն ծառայել բանակում, բայց կառավարության մեջ են:

«Հայոց բանակը պետք է մերժի այն մարդկանց, որոնք իրեն թիկունք չեն կանգնել: Հայոց բանակը պետք է մերժի այն անձերին, իշխանություններին, որոնք զորահավաք չեն կատարել, չեն լրացրել բանակի շարքերը մինչև վերջ մարտնչելու համար,  Ապրիլյան պատերազմից հետո չեն գնել այն ժամանակակից ավիացիայի, ԱԹՍ-ների այն խմբաքանակը, որը պետք է աջակից լիներ հայոց զինվորին:

Այս ամենի արդյունքում հայոց բանակը ժողովրդի հետ միասին համապատասխան քայլեր պետք է կատարի այս հոգեբանական իրավիճակից, այս հոգեկան արգելակված իրավիճակից: Այդ վիճակը հասկանալի է, ամեն տուն սուգ է մտել, մարել են այն ճրագները տների»,-ասաց նա:

Սեյրան Օհանյանը նշեց, որ բանակը երեք քայլ պետք է կատարի. «Առաջինը՝ ժողովրդի հետ միասին պետք է առաջատարի դեր կատարի՝ այս իրավիճակից դուրս հանելու համար՝ ճիշտ նշելով զոհվածներին, անհետ կորածներին, գերության մեջ գտնվողներին, սատար կանգնելով բոլոր զոհերի հարազատներին, որոնց առջև մինչև գետին խոնարհվում ենք:

Հայոց բանակը այսօր սահմանում պետք է կանգնած լինի, որպեսզի սահմանապահ գյուղացիներին, ռազմավարական շատ կարևոր կետեր և ճանապարհներ կարողանա պահպանել: Այսօր հայոց բանակը հայ ժողովրդի հետ միասին պետք է բացատրի, թե ինչպիսի ռազմավարություն է կատարում մեր անվտանգությունն ավելի բարձրացնելու համար:

Այնտեղ, որտեղ բանակն ու ժողովուրդը միասնական են, նրանք անպարտելի են: Մենք ոտքի ենք կանգնելու, այսօրը նորից լինելու է զարթոնքի օր»,-ասաց պաշտպանության նախկին նախարար Ս. Օհանյանը: